鮮奶椰皇燉蛋白

17-Sept-2013

兩個月前在包神莎莉豪的blog內看到這個食譜, 幾乎”嘩”一聲叫出來!  完全無諗過係咁易整既.  以前在中環上班, 有一間叫金御的酒樓就有這道甜品賣, 佢d點心麻麻, 唯獨呢個甜品做得好好. 不過唔係每次去金御飲茶都會點鮮奶椰皇燉蛋白, 事關當年(約5, 6年前)都賣成$38盅架.  果陣時食過飯盒都唔駛$38啦!

 

點解等成兩個月至出手? 係因為椰皇並唔係好似買橙咁, 週圍有得賣.  早年每逄經過花園街, 在賣生果果一區, 好鍾意買返個冰凍現開椰皇水飲下, 揀直係透心涼呀, 好記得係$5個, 不過椰皇體積嬌小, 真係幾啖就KO左佢.

 

個多月前在菜檔見有椰皇賣, 但要$10個, 心諗, 真係物價飛升(定係我買米唔知貴), 呢d無雪凍, 又唔係會幫你開埋既椰皇都要賣$10個!

 

之後又在屋苑間百佳見到有椰皇賣, 嘩! 仲貴, 要$12.9一個.  梗係要諗諗先啦.

到我幾乎忘記了想整呢道甜品時, 個天好似會提醒我咁...........昨天搭巴士時, 巴士在紅燈前停下, 好在坐上層, 俾我見到佳寶放左一堆椰皇近窗邊.,於是落車入去八下. 咦! $10有3個? 好抵喎, 即刻買左3個返屋企做實驗.

材料 (3個燉椰皇的份量)

材料	份量
椰皇水	180克
鮮奶	180克
蛋白	105克
糖	30克

在椰皇底部, 距離約1吋的地方, 用刀角劏開, 大約劏開一半, 便可以用手擘開. 另外, 椰皇頂部, 亦即是尖果面, 可以削平少少, 那麼便容易坐在碗內

第一個椰皇劏開, 水有165克



第二個係181克, 第三個係155克. 所以一共有椰皇水501克. 點解要續個量重係因為咁樣先知道每個椰皇的容量嘛


糖加入椰皇水內, 小火加熱至糖溶


蛋白和鮮奶混合


把煮溶糖水加入鮮奶內, 攪勻



然後過篩入椰皇殼內



燒滾一鍋水, 放入巳蓋上錫紙的椰皇. 以中大火蒸20分鐘



完成










註: 可能我的煮食爐火力不平均. 當中只有我用來拍照的椰皇凝固得最好.  其餘兩個都水水的, 有可能是蛋白份量不夠. 另外, 我覺得淡左d, 要再試過比例.  由於只取了180克椰皇水, 還剩下321克在雪櫃, 可以再調節各項材料的比例, 由於個椰皇殼俾我地刮晒d肉, 巳經掉左啦, 只可以用碗仔燉