2013年3月14日 星期四

“慢”遊老撾 ~ Day 10



 
 

8-Mar-2013 (Fri)






Muang Ngoi Neua
(是日行程: trekking to Huey Xen
Village)



 



昨晚一停電我便上床瞓覺, 加上這裡很寧靜, 所以睡得很香甜. 今朝約6時便被透進室內的陽光喚醒, 雖然咁早就醒左, 但我又沒有想賴床的感覺喎.



 



一早起來便見到讓人身心舒泰的景色, 大愛! 










先去找地方吃個靚早餐, 我想去張佳樺的書所介紹的Buapha Restaurant 15,000K一位的breakfast buffet, 可惜我在整條街行了兩次還是找不到, 我諗巳經關門大吉了, 老撾的變化真的急速.






在路口最當眼的位置有兩間打對面的餐廳同樣有供應
breakfast buffet, 不過巳漲價至20,000K. 我挑了這一間由幾位年輕人打理的, 我見對面果間得一個好老既阿婆在場, 我怕佢……….




我一入坐便見到幾位和尚在化緣
, 原來這裡也有這個儀式. 可惜到我拎起相機, 他們巳走過了, 我只能拍到他們的背影.






餐廳會
set一張長桌子在門外, 然後把食物續盤端出. 雖然咁樣露天放食物唔係幾衛生, 但呢條街都冇車行, 我望過食物都好ok便入坐打算一試





























食物味道就一般啦
, supposed是熱食的食物都冰冰冷冷的, 我習慣早上吃熱呼呼的食物, 肚子會較舒服






雖然食物麻麻
, 但我陣間要去trekking幾個鐘頭, 所以一定要食飽d才有氣力行路. 



 

嘆早餐嘆左個幾鐘, 又再走去售票處睇下買唔買到明天的船票, 點之職員話不設預售, 要我明天再去買喎!







返回bungalow執拾一下背包, hea多陣, 大約8:30am才出發去Huey Xen Village. 這條小村距離Muang Ngoi Neua兩小時腳程.



步行了半小時便見到呢個收費亭, 所有是居民都要留下10,000K買路錢.  在老撾, 連去公廁都要俾錢架!






職員話這10,000K買路錢是包含參觀在售票亭對面的Tham Khang Cave. 
呢個洞一定要澗水才可以進內參觀, 我唔想濕腳除鞋, 加上Lonely Planet話入面有蝙蝠, 我更加唔敢入去.  就在洞外拍照留念算數.



這個洞口不大顯眼





我只可以行到去呢度探頭向入面裝下. 這兒的
水質真係好清澈, 比湄公河好多了






就在這個洞外遇到6個法國人, 原來他們參加了2日一晚的trekking, 由兩個本地tour guide帶領著. 由於大家都是前往Huey Xen
Village
參觀, 他們很好人, 還邀請我一起步行前往.  我心裡暗自竊笑, 有得痴免費導遊真係爽! 未遇到他們時, 我一路行, 一路都要拿著本Lonely
Planet睇路線.
因為只有呢本天書才有以文字形式教大家點樣行去Huey Xen Village. 而張佳樺本書就冇教到點行.




由收費亭這裡到
Huey Xen Village, 其實還有個半鐘的腳程.  沿路的山景, 小橋流水, 稻米田都美不勝收













過左呢條小木橋有個分岔口
, 要朝左邊步行才可以到達Huey Xen Village






見到呢個牌便是行對方向了




再向前行約
45分鐘才到Huey Xen Village. 我的團友們年紀都不少, 所以他們行得比我慢好多.




真的足足行了
2小時才到這個步落. 其實我唔明點解佢地要居住在咁偏遠的地方, 一來一回急步行都要4個小時呀, 沿途仲要沒有樹陰, 我就在這趟trekking,
被晒到變成女版古天樂.


 






導遊真hea, 帶大伙兒來這家餐廳休息, 其實剛才半小時前才休息了20分鐘! 他兩來到這裡又第一時間飛樸上張吊床度.






大家都混身是汗, 好想飲冰凍飲品降溫, 可惜這裡是沒有冰, 更加沒有雪櫃, 所以汽水係熱架, 點飲呢?



仲有menu讓遊客點餐, 不過太熱, 冇人有胃口吃東西




村民的生活還是很原始
, 會把炊具掛在門外, 在路邊生火煮食




呢個水煲生晒锈都仲繼續用








我遇到村裡面唯一懂英語的伯伯, 他在村內經營民宿及餐廳. Lonely Planet及張桂樺的著作內都有提到他. 我從背包取出張桂樺的書讓他看逗得他很高興, 因為本書有佢張相嘛!




老闆帶我去看他經營的民宿, 一晚的宿費好像是10,000K. 他叫我下次可以住在這裡,我探頭看過入面的環境是無敵簡陋, 空間很小, 窗冇燈又冇浴廁. 迄今大部份的老撾人都是習慣在太陽下山前一家大細往邊沖涼的, 來了這個國家十天, 雖然巳習慣了在路邊草叢如廁, 但要我在室外大庭廣眾沐浴就…....我諗我還未有勇氣入住咁原始的民宿.



其他的村民見到我把書遞給老闆都好奇地湊上來
, 把張桂樺的書翻了一遍又一遍.






在老撾
, 經常可見到一家大細的走地雞, 走地豬, 走地鴨, 走地羊. 當地人習慣讓動物自由走動.

























村子的全景


在Huey Xen Village逗留了差不多一小時
, 大約11:30am我便和法國朋友告別, 他們會繼續去另一個步落參觀及住宿, 而我就想趁還未正午的時候趕路回bungalow. Vang Vieng領教過中午太陽的毒辣, 真係好怕會中暑.






我只需要沿著舊路便可返回
Muang Ngoi Neua. 
這段兩小時的路其實人影都冇隻, 有時都幾驚有猛獸或蛇跑出來, 聽講老撾還有野生老虎……




我這雙特地為這趟旅程所買的水陸兩用鞋子, 前幾天在Phonsavan落大雨那天巳被泥漿所摧殘成咁樣了....鳴鳴鳴





回程時見到前往Huey Bo Village的路牌. Lonely Planet有介紹到這段路雖美然而比較難行




回到旅館也差不多2:00pm, 我巳變成一隻水人. 二話不說先把房間內的一瓶水先乾掉再快快衝進浴室整番個冷水淋浴.



洗完白白就到屋外吊床上hea, hea到四點幾突然聽到大約十下炸彈爆炸聲, 嚇得我連滾帶跳反回室內. 當爆炸聲停下來, 我便打開窗簾看看乜嘢環境. 點知個個人都好像若無其事似的, 好似聽唔到咁. 之後問當地人, 原來附近有人發現未爆的戰時炸彈, 於是將佢地引爆左. 我咁大個人第一次聽到咁震撼的炸彈爆炸聲, 真係嚇破胆



我不喜歡到主街那裡找用餐的地方, 因為條街冇街燈, 條路又爛溶溶, 一到晚上並不好行. 所以晚餐我係prefer 喺旅館附近用餐. 我揀左位於旅館對面, 售票處前面的Lattanavongsa
Restaurant.


我點了鴨肉炒飯(15,000K)及一罐可樂(6,000K).  等了20分鐘這盤炒飯才上桌, 可惜味道又油又咸, 把它吃光純粹是為了裹腹

 

Muang Ngoi Neua被編入我的行程內是因為我受張桂樺書中所寫的吸引著來.  她說: 很多旅館的餐廳也提供很好吃的家常料理, 來這邊吃真是方便, 便宜又美味!”  可惜的是, 來這裡兩天, 吃了三餐都冇覺得有那一餐是好吃. 







  


3 則留言:

1733 提到...

會唔會係你咀尖,所以覺得D野唔好食呀?
[1733回覆05/16/2013 00:11:33]試過超過24小時冇嘢落肚?
喂老友,減肥都唔洗咁吖?要注意身體健康為重噃?
[版主回覆05/15/2013 17:00:32]你講既原因都中晒. 我係果d唔好食, 唔啱食就寧願捱餓既人. 我在老撾好多時都是空著肚子的. 試過超過24小時冇嘢落肚.
[1733回覆05/14/2013 22:35:50]哈哈,點解我會講你咀尖呢?原因是1)你喜歡整野食,2)你對食有要求。
咀尖,不一定指負面既野。
[版主回覆05/14/2013 16:14:59]我唔否認自己咀尖, 但我諗所有在香港食好住好的人都和我一樣. 我在老撾所認識的瑞典人, 德國人, 法國人, 美國人, 馬來西亞人, 國內同胞, 大家都認為老撾的食物不好吃又悶. 有個德國妹仲話見到湯粉就想嘔.

1733 提到...

我細個既時候返鄉下,途經廣州。
賣既汽水都係無雪既,真係都唔知幾難先至飲得晒佢。
[1733回覆05/16/2013 00:15:13]你教得完全正確。
我後生時去露營,我地都將D西瓜,生果、飲品、帶去做煮飯時要煮既餸都係放在流動中的溪水裏面架。
你好叻呀!
[版主回覆05/15/2013 17:04:44]所以我寧願個口漿住晒都唔飲. 老撾人好單純, 冇電冇雪櫃冇冇冰咪就咁俾熱汽水人飲! 於是我教果位民宿老闆, 可以把汽水放入一個網袋度, 再放入冰涼的河水中浸著, 咁咪可以有凍汽水賣俾客人飲囉.

oiwing 提到...

勞動完一輪又無選擇既情況下,應該就會覺得咩野都好食。睇情形,係因爲你未行到虛脫
[版主回覆05/20/2013 11:14:38]果種辛苦法非筆墨所能形容, 5個小時在三十幾度高溫下行走係幾咁和味. 我朝早七點幾食過嘢, 到夜晚才吃東西, 隔左十幾個鐘, 幾難食都要食.