霞飛會館 (嘈死人咩)

相交X年的老朋友相約11月30號晚共進晚餐, 慶祝貓姐身壯力健, 回復最佳狀態回鄉省親.  

還順道慶祝似媽咪似到11成的小君君又大一歲.  早幾個月我生日時去過一次的霞飛會館, 大家都覺得不錯. 所以今次一行4大1小再次幫趁. 



我們幾件惡女本想拖埋長春不老Uncle丁落水, 皆因Uncle丁和霞飛會館相熟, 我等貪心小女人梗係幻想經理會番送個甜品, 果盤, 免茶芥之類啦.  不過丁大爺是日有約唔得閒應約. 那我們的美夢便成泡影.

在等候貓姐的時候, 我們都覺得肚餓, 於是先叫兩個冷盤填填肚!

 

蛋黃豆辦酥 – 記得細個幫趁過幾次巳結業N年, 位於銅灣灣道, 法國醫院對面的"鄉村飯店"食過豆辦酥. 我仲記得佢個造型四四方方一舊的, 不花巧, 但好好食, 蠶豆味香濃. 可惜現在巳很少見餐廳願意做豆辦酥了. 聽說是因為這道冷盤既花功夫又不賣錢, 所以有機見到在餐牌上便應該要點.  這道冷盤咸咸香香, 很開胃, 和面頭炸脆的江瑤柱很搭配, 不錯.

燻魚 – 唔係咁好食, 魚肉有點炸過火, 而且魚肉切得太薄冇咬口. 以前上海舖果d好厚架

冷盤一上桌便見到貓姐到了, 真好, 可以叫埋其他的菜式. 好想試新嘢但又想encore上次點過的酸菜桂魚.

青豆仁炒火腿茸 – 都幾好食, 炒得唔油身. 但之前食過灣仔浙江軒的, 大家都覺得浙江軒炒得比較好食, 連d豆都甜d脆d.

酸菜桂魚片 – 這道我堅持encore的菜式巳經沒有上次咁好食了. 好明顯的改變便是湯頭冇上次咁濃郁, 魚味單薄, 還有配料都比上一次少.

咸肉菜飯 – 其實這個砵是很細個的, 大約只有5吋直徑. 女部長瞓身推介, 不過大家的意見都是咸肉的咸鮮味都沒有滲進飯內, 飯很淡味, 咸肉又咸左d, 所以吃起來像是飯煮好才把咸肉加入撈勻.

薺菜肉絲炒年糕 – 廚師可能為照顧香港人口味, 把這個炒得太淡了. 定係唔記得落鹽呢! 細個很喜歡吃上海年糕, 但而家我就變左心, 鍾意韓國年糕多d, 入口煙韌好多呢!

原盅東坡肉 – 弄成bite size的東坡肉. 肥到冇朋友, 成件都係肥膏. 向瞓身推介的女部長投訴, 佢都話覺得今晚肥左d(早響呀丫大佬!). 我們都只是夾硬食了3件, 還有1件冇人吼. 

還有一樣幾嘔心的發現, 豬皮表面有些毛, 我估計是臨上桌, 廚師在豬皮表面用掃掃一層油等佢賣相靚d, 但個掃甩毛囉. 肯定唔係豬毛, 因為豬毛唔會長成咁.

蘿蔔風鵝煲 – 都是女部長推介. 呢個是全晚最好食的菜式, 很特別. 風雞臘鴨就聽過, 風鵝都是第一次有幸認識.

 

蘿蔔香甜冇渣, 軟硬度恰到好處. 風鵝肉還很軟嫩冇臘鴨果陣油膉味, 連皮都冇肥膏, 忍唔住吞埋. 啖湯更是一流, 不油膩, 嚐到蘿蔔的清甜味和風鵝肉的鮮味. 輪到我瞓身推介.

這頓飯埋單HK$1,100. 我們也真是點得過多了, 好彩冇靚仔在座, 否則咁大食失禮死人.

今晚最不滿意的是座位編排, 我們被安排的桌子是在餐廳的中央, 不知是室內設計問題還是甚麼原故, 直情覺得自己整晚身處一個啦吧, 嘈到頭都痛晒, 同朋友交談很辛苦. 上次我們坐近角落就沒有嘈到拆天呢個問題.  如果想靜靜地食餐飯, 這裡不是很好的選擇.