2013生日飯第二擊@南燒北鍋

27-July-2013

昨晚吃到肚滿腸肥, 今天繼續讓肥膏滋潤我.

 

今晚約了另一班老朋友吃飯. 咁”橋”餐廳名都是由”南”字開頭. 南燒北鍋之前是開設在灣仔大佛口果頭的.  我兩年前食過一次覺得質素唔錯.

其中兩位朋友住在新界區, 那麼選擇在尖沙咀區吃飯是最方便大家的了.  翻閱"飲食男女", 見到南燒北鍋的廣告, 細閱下得知巳遷往尖沙咀.  

循例上Openrice睇下食評, 居然俾我見到有coupon可用, 於是立即download. 正所謂"有便宜唔駛洗頸"吖嘛.
 

呢個coupon都幾筍, 除了可以用$39吃原價$168的回味雞煲(半隻)外, 火鍋配料仲有7折添.   雞煲近年都很火熱, 但我呢個大鄉里就一次都未食過, 趁有折扣不防試下啱唔啱咀形.

南燒北鍋位於尖炒咀加拿芬廣場二樓


約左大家7:00pm, 我早左少少到. 地方不大, 在同一層樓還有另外兩間日式食肆


我坐底冇耐, 就將張coupon交俾侍應, 佢話可以先幫我下單, 到人齊時才上


不久便送上一碟餐前小食(要收錢架, $12碟), 個樣似蘿蔔乾, 不過我無食過, 所以不能評論好味與否.


海鮮餐牌. 太耐無食過象拔蚌, 乜原來而家要成千銀一隻架, 巧貴喎


無花無假, 回味雞煲皇半隻雞是$168






5分鐘後靚媽P和心急人S結伴同來, 兩人嚷著肚餓, 想先叫點小吃填肚, 因為A妹有要事遲一點來, 咁食住少少嘢等佢.

叫了脆皮炸豆腐($48) - 熱辣辣, 香噴噴. 最估唔到係豆腐味相當濃, 食到停唔到口


及椒鹽鮮魷($68) - 呢味就唔及椒鹽豆腐, 我嫌佢粉太厚同埋鮮魷切得太細舊, 冇咬口
 

A妹約8:00pm趕到, 原來她今天下午要帶女兒小K去新蒲岡考試, 一考完就趕過來. 無見小K半年, 高左好多呀, 小朋友都大得很快!


待A妹一到我們便請侍應把雞煲上桌.

嘩! 我地都以為自己老眼昏花, 半隻雞都咁大鍋, 於是立即把巳選好的火鍋配料紙刪減幾樣, 否則食唔晒便浪費.

廚房會把雞煲煮至7成熟, 侍應拎出來之後會用餐桌上的電爐加熱, 把雞鍋煮至全熟.  鄉下妹第一次食雞煲, 唔識比較. 但這兒的雞都煮得好滑同好惹味又不會很麻很辣, 合大眾的口味, 我們也很滿意.


食完雞煲, 侍應會把個煲取回去廚房加湯, 再拎返俾我地去滾. 呢個時候配料陸續送上.

最先送上炸魚皮($40) - 仲熱架. 呢度既炸魚皮比坊間的厚身, 所以要淥多幾秒先得, 雖然話佢厚啫, 但我又鍾意喎


油麥菜(32) - 正常!


生根($32) - 無食到, 我唔係好嗜生根的


醉海中蝦($148) - 蝦好新鮮, 見到蝦d腳仲喺度撐下撐下. 一客有6隻, 用杞子同紹酒浸住


淥熟後酒味不太強, 而且蝦肉好爽甜添


蟹柳(35) - 我無食到. 我通常出街食火鍋的話不會點蟹柳來吃


超甜粟 ($30) - 食左一件, 覺得唔甜就無再食第二件了, 所以都剩返幾多


荔芋片($30) - 麻麻, 切太薄同埋炸得唔夠乾身, 好油


鮮四寶丸 - 大($98) - 左起是鯪魚球, 梅菜豬肉丸, 蝦丸同墨魚丸. 丸丸就真係唔錯嘞, 樣樣都鮮味, 我最欣賞蝦丸, 夠晒彈牙.


花枝片($58) - 頭先巳經食破戒食左椒鹽鮮魷, 所以呢味都只是淺嚐, 皆因本人的胆固醇好勁也


一口手捲響鈴($48) - 唔知點解次次食火鍋都一定要點響鈴. 呢個都係鮮炸架, 唔錯, 起碼無油膉味!


鮮蝦水餃 ($68) - 實在太飽了, 只係食左一隻. 無乜特別, d蝦肉太少了


魚皮餃($48) - 我本身不愛吃魚皮餃, 所以no comment.


四個女人居然點16樣嘢, 真係大食呀.

唔記得影相既有烏冬($32)同埋酸梅湯($58). 要讚一讚南燒北鍋的酸梅湯, 煲得夠濃又無過甜的憋病, 好正! 至於個烏冬我食左一, 兩條, 都覺得好滑


真係記得畀七折我地喎


註:
南燒北鍋樓底都幾矮, 加上桌與桌之間好親蜜, 所以坐坐下都覺得好噪, 聽朋友講嘢好辛苦. 左邊果枱四個女仔好斯文的, 說話細細聲, 而坐我地右手邊就有5件蛋散, 講嘢大聲到死同流民爛仔無分別. 不過客人既嘢唔到我地揀, 坐正一堆啦叭隔離只可自嘆倒楣.

侍應生雖然略嫌不太足夠, 但服務方面還是很落力勤快招呼客人.  是可以回頭幫趁的.

2013生日飯第一擊@南京東路

26-July-2013

老朋友們都很有心, 每每個多月前便相約我吃晚飯慶祝. 尤其是大姐I, 次次都係佢落力做聯絡人.

 

我個人好懶出街, 所以連帶外食機會都不多. 好在仲有"飲食男女"呢本雜誌可以參考下.

 

兩個人呢就食西餐或日本菜最好, 咁我地五條荗李, 食中式夾下夾下最perfect.  睇番上兩期”飲食男女”介紹, 位於銅鑼灣的南京東路 好似唔錯咁喎,
再上埋openrice睇食評, 都算正面.

 

南京東路是老牌酒樓
–
敍福樓旗下的食肆, 才開業數月而巳.  我打電話去訂位, 知客問我要唔要訂南京填鴨, 咁我又真係未食過南京填鴨, 咁就訂左一隻了.

位置好就腳, 就在銅鑼灣皇室堡二樓


睇呢幾個字好有氣勢

 

原來入面積好細架咋, 大約三百尺到啦. 枱與枱之間好迫下. 侍應安排我入坐一張卡位


侍應問我飲乜嘢茶. 原來佢地有龍井, 一般茶樓菜館都好少serve龍井呢類綠茶, 咁我就點呢樣啦.


我最早到, 可以慢慢研究下菜牌先.  根據"飲食男女"所報導, 南京東路是一家京川滬菜館, 並不是純粹吃南京菜的啊.  在香港比較少純吃單一地方的北方菜館, 通常把京/川/滬炒埋一碟.


餐桌上還有其他的單張 呢個套餐菜牌, 由二人至四人都有


菜式選擇睇落都唔錯


呢個京燒鱸魚好吸引喎, 仲要就緊特價添


一直都知鰣魚係名貴菜式, 不過我就未食過嘞




一向有早無遲的大姐I無幾耐就到, 唔夠五分鐘便見到君君媽來到. 傾左十零分鐘, 大家都喊肚餓, 所以叫住兩味頭盤攝牙罅先.

四喜烤麩($32) - 我地三個一致喜歡它夠清淡, 唔會太濃味, 比較適合廣東人清淡的口味. 但可能正宗上海人就會嫌淡的了.


燈影牛肉($52) - 呢碟等左十幾分鐘至有. 期望過大變成失望. 一食入口好攻喉同埋條脷好唔舒服, 熱氣感覺強烈, 又好似吞緊一堆味精咁.


燈影牛肉上桌無幾耐, 貓姐便出現了. 她工作的地點是ICC, 好吊腳. 所以佢要成45分鐘才可以來到銅鑼灣. 我地四個超齡少女吹水吹了一個鐘, G少才出現. 我們也習慣了他的例遲, 佢準時到反而我地會O咀.

G少3月生日果餐飯我因為身在老撾做電波中女而未能參與, 所以應該有大半年無見過佢. 佢一出現叫我們吃驚, 因為佢好瘦呀, 好似食左瘦肉精咁. 原來佢都知自己瘦左好多, 睇左好多專科都話各方面正常, 真是莫名其妙. 我話要點個東波肉或者元蹄俾佢自隊.

京燒鱸魚($68) - 呢碟君君媽超like. 咁其實我地個個都讚. 條魚炸得啱啱好, 上桌時還能保持外脆內嫩, 調味又恰到好處. 都未食完, 君君媽巳經嚷著要點多一條. 因為5個人以上是可以點兩條的. 不過最後都冇再order, 因為驚食唔落隻烤鴨嘛.


清炒萵苣絲($48) - 大姐I曾在北京工作一段時間, 佢話當時很喜歡這種蔬菜. 我就第一次食萵苣, 佢有種獨特的幽香, 唔錯喎. 但君君媽就嫌佢有陣怪味.


黃魚煨麵($52) - 我係因為睇左openrice的食評才會點這碗麵. 果然好好食喎, 魚鮮湯濃, 最衰得四舊魚, 有一個無得食, 手快有手慢無.


火腿津白($58) - 呢碟菜都好好味呀, 大廚將佢炆得好入味又無淋pat pat的問題, 火腿的肉香味索晒入d菜度. 平時食呢道菜好多時都有一些"油膉味"或""up味", 佢又無喎


鮮肉小籠包($28) - openrice的食友對這兒的小籠包的評價都很負面. 我都心裡有數, 不過俾次機會佢咁啦. 我姨甥女好鍾意食小籠包, 咁如果呢度好食, 我下次可以帶佢來吖嘛. 

言歸正傳, 佢既死因係難食? 點難食法? 皮的底部太薄, 每一個人夾起都穿底, 而最關鍵的肉餡, 佢唔算無肉汁, 但係d肉好鞋, 無豬肉的香味只有雪味囉.


南京烤鴨($248, 一食) - 隻鴨等左半小時才送到. 因為我坐最埋邊, 經理把烤好的完整肥鴨送上讓眾人過目不夠一秒便拿去分屍, 我連叫停佢影張相既機會都無.  不過經理拎過來時, 我都睇到個賣相係好得既, 好明顯係剛烤好.

咁我當然唔信係即叫即燒啦, 無可能半個鐘燒好隻鴨. 我估店方係預先烤至半熟, 待客人下單後便烤至全熟. 

呢度既烤鴨我就食唔出南京定北京風味, 我只係覺得皮夠晒脆. 至於肉質就無"鴨臊"味, 但略嫌鞋左d, 可能烤得過火左少少, 但可以接受既. 總括而言, 好過舊年去食新美利堅果隻北京填鴨多多聲. 


每隻鴨跟四客沾醬同三籠夾餅. 唔夠醬或者想要多些夾餅要另外再俾錢


一籠有四件夾餅, 其實塊夾餅唔好食, 薄得來硬. 我寧願食返傳統"荷葉餅"


橙黃色果條係哈蜜瓜絲來的, 很有創意





接下來少不了整番個甜品潤肌, 為美好的一餐劃下完美句號. 大姐I一向不嗜甜, 所以只有我們三人點了甜品.

甜品算是整頓飯最失色的一環, 勁扣分!

君君媽和貓姐的桂花釀丸子($25) - 兩人異口同聲說唔單止無甜味, 桂花及酒釀也下得太少, 根本品嚐不到.


G少的薑汁湯圓($25) - G少話薑味OK, 但嫌湯圓太細粒喎


我的水中花($38) - 賣相很美, 但好細碗架咋. 我撈起來看個底部, 其實是一舊鈒出圓筒形的豆腐花, 再將上面切成花形. 的確很巧刀功. 賣相滿分, 但味道零分. 跟君君媽和貓姐的桂花釀丸子一樣, 係無厘聞味架


埋單$802. 真係幾抵食! 個人覺得值得再幫趁, 但甜品就可免了....哈哈


註:
搭車回家時查看手機, 見到南京東路的missed call, 但又無留言. 咁我check過手袋無漏嘢, 所以都冇即時撥回電話給他們. 到了隔天早上, 君君媽打電話給我, 原來一向表面上精明的她, 當晚回家也未發現漏左個袋喺南京東路, 直至一宿無話兼發左個好夢之後的第二天早上後才發現遺留了一袋很重要的物品在餐廳. 

君君媽馬上打電話去南京東路, 原來員工巳為她妥善保存該物品, 君君媽於是可以鬆一口氣. 在此要讚讚南京東路員工路不拾遺的高尚情操. 希望君君媽汲取教訓, 第日出街唔好漏低左小君君都唔為意便謝天謝地了.