2013年1月22日 星期二

老番工展會 ~ 本地漁農美食迎春嘉年華2013







19-Jan-2013

 


實情d friends巳經同我講過呢個嘉年華又是另一個類似工展會的促銷活動. 貨品又貴又冇乜特式. 不過阿媽想去就當個乖女陪佢去逛下啦.


 


在太子落車, 先去醫肚. 在附近一間幾有規模, 叫永興的茶記吃個brunch.


 


我的茶餐 ($38). 豬扒螺絲粉 + 火腿奄列 + 牛油多士 + 茶走少甜. 杯茶有好大陣我至憎的花奶. 塊豬扒又肥又好鬼薄, 係個螺絲粉煮得幾好, 不太淋有點咬口. 奄列就合格啦, 冇乜驚喜.






阿媽的叉燒拼燒肉飯 ($39), 附送例湯及熱飲. 飲慣阿媽煲的西洋菜湯, d例湯梗係唔吼啦. 講番碟飯叉燒切到好薄, 燒肉又細細舊, 唔抵食. 老豆叫的是咖喱牛腩飯, 我想影但唔夠佢手快, 巳經刪鬆晒碟飯. 數埋得4粒牛腩. 老爸話d牛腩好硬喎, 他硬不動.




食飽就行去花墟球場
, 嘩都幾遠, 要行成20分鐘至到.




在入口有幾個女童軍在派這本載有優惠券的小冊子. 我諗冇乜邊個參觀人仕會記得用, 當然我地都冇用到.





一入場便見到熟悉的大牌子攤位
, 個陣實在太似工展會


 



幟哥的
龍皇酒家”都開個壇喎! 估下賣乜


原來喺度賣海味



幟哥鄰檔賣潮式糕點. 呢位阿姐切花生糖切到啪啪聲



Jacky Yu都唔執輸, 整番個檔賣魚蛋, 燒賣





場內有好幾間代理賣呢種黑瓷爐. 講到萬七咁多樣好處





臘乳鴿第一次見
. 但點解廿皮一隻咁平呢? 平時在凍肉店都見賣成三十幾蚊一隻冷藏的. 水晶臘肉個樣好生抓抓”, 唔知用咩方法整乾佢





跟住向前一區進發便是貼番大會主題的農產品展銷處





好靚的有機菜
, 品種原來非常多.  冇幫趁呀, 咁貴. 屋企人多, 套用廚神G的金句: 食到一餐唔食到下一餐




S小姐講過d有機薑$50, 果然俾我見到.


有機黃薑仲貴, $60


有檔賣盆栽的, 都幾多人幫趁. 花......應該唔係有機卦


水耕菜. 呢款沙律菜在荃灣街巿和大埔街巿才賣$30, 點解呢度仲要貴$5!


呢枝准山長左對腳架, 好得意





第三區部份是賣海味的.


 


呢個檔差不多全場最大, 個名改得好浪漫 - 叫"浮家泛宅". 不過我覺得同咸魚唔係好襯


最吸睛的便是這條龍躉咸魚. 睇相好似唔係幾大, 但現場睇好震撼.


另一檔剩係賣花膠. 真係過千隻都有


展場最入是一個臨時food court, 都係魚蛋, 燒賣, 炒麵, 汽水之類. 最特別是呢種棉花糖, 好耐冇見


臨時food court旁搭建左一個佈景好似間廟的表演場地. 唔少得問題遊戲呢個環節啦. 台上有個師傳在切燒豬, 唔知有冇分俾現場觀眾食呢


呢檔的佈置最揼本同cutie, 佢真係剩係賣蕃茄同薯仔



終於見到寶石魚的廬山真面目
. 個樣好似褔壽魚. 不是有機養殖的賣$30-50. 有機的賣百幾蚊條, 視乎大細



廚神G在第一天巳踩場, 她在whtasapp展示買了這家農場的音樂雞蛋, ! 個蛋黃脹卜卜, 靚仔到呢. 廚神G的試食報告是音樂蛋蛋味香濃. 本來好有興趣買幾隻試下, 點知原來一定要一整盆30隻咁買.  我成家人都高胆固醇, 邊敢咁放肆食咁多蛋.  我想問廚神G, 你屋企得兩個人點消滅呢30隻蛋?






阿媽在這檔口買了一枝有機豆漿解渴. 因星期日是最後一天, 所以減價出售, 每枝$10. 早前睇飲食雜誌都有介紹呢隻有機豆漿, 我知姨媽傢私有得賣, $15.  不過呢枝有機豆漿, d豆味都冇, 飲完條脷好鞋. 

多年前在中環IFC一間餐廳飲過有機豆漿, 充滿豆味又杰撻撻, 至今仍然記得果陣香味.


這種推動本地土產和農業的活動很值得支持, 唯現場所見, 有好多都係路人皆知的知名品牌, 我覺得就冇必要出現. 主辦單位應該好好篩選參與機構, 以免又淪為另一個促銷活動.


1 則留言:

ling ling - O尾豬 提到...

本來我諗住行完去壹點心, 但拎到好攰, 都唔記得添.

聰明蛋有細盒賣, 50蚊6隻, 好唔抵o者, 所以我先買30隻, 好快呀, 15日咪食到30隻蛋囉.

妳有無見到韓國製既長型風乾機呀, 好吸引呀.
[版主回覆01/23/2013 10:21:07]冇見到韓國製既長型風乾機噃, 或許人多, 我冇留意到. 果日都幾多人. 寶貝, 聽我講, 不要吃太多蛋呀, 尤其是蛋黃, 好高胆固醇. 我阿姨就係成日食蛋, 最近去驗胆固醇, 居然係8呀! 超誇張.