Afternoon Tea @ Mo Bar

30-Dec-2012

這個約會是為美女T和美女V慶生的,日子本來定在16號, 後來林博士突然間要到台灣公幹, 於是改了去30號.

 

Mo Bar是美女V提議的, 我們眾人當然沒異議兼lur飯應, 事關N年以來我們都習慣了”0意見”的美女V. 又可以咁講, 美女V一向順得人.

 

Sunday High Tea 3pm 開始, 我第一個到, 影下個環頭先 (影得好樣衰添)

每位$240 + 10%, 以Landmark Mandarin Oriental Hotel呢d級數的酒店來說, 真係幾抵.

班友3:30pm才陸續出現, 我巳餓到反肚.  我只在朝早10am吃了一片麵包咋, 天寒地凍唔捱得餓.  之前一日巳特登whatsapp各人, remind大家high tea是3pm開始. 啱啱去北歐睇完北極光返香港的美女T居然睇錯3:30pm, 萬分佩服. 又有可能佢大老遠去到北歐睇唔到北極光敗興而回所以心神恍惚.

 

吧枱放有多款精美甜品可以任取(冇影相, 我驚俾人鬧). 原來美女V是馬卡龍殺手, 我和她第一輪先搶供各式各樣好鬼靚的馬卡龍. 美女V果然冇介紹錯, Mo Bar的馬卡龍真係好得. 我和她也吃了很多個.

中間橙橙地色果件係marshmallow, 嘩! 甜到嘔, 吃了半件便放棄.

crème Brulee 好好味, 好滑嫩又不太甜. 不過我覺得面頭放提子乾唔多夾味.


這裡是慢工出細貨, 飲品點了十幾分鐘才上桌.  我點的是熱朱古力, 陣容鼎盛卦? 味道非常香濃, 甜度恰當. 睇賣相都知好有誠意, 不過就冇得添飲. 蝕桌!


好友們都點茶飲, 佢地就有得不停添飲, 因為天氣寒冷, 我杯朱古力好快就凍晒, 幸得美女T施捨Earl Grey Tea給我. Earl Grey Tea同朱古力混合都幾好飲架, 唔會攪肚痛.


Scone打頭陣. 左面的是原味, 右手面的是raisin scone.  Scone不錯, 送來時是微溫的, 香香脆脆, 但唔係我最喜歡的口感.


Tea set 的咸點接著上桌. 其實樣樣都好食, 可惜真係太細件, 不適合飢餓人士


呢一盆跟tea set上的甜點, 我只吃了半件最左手面的minced pie及戴了綠帽的religieuse.  呢兩樣都唔好食, 太甜了. 故此呢一盆甜點是剩下很多的.

 

在吧枱取的chestnut tart一樣甜到痺, 甜到冇晒栗子甜, 何必呢?

“開胃啦”食評: 因為掛住傾計, 只係出左去吧枱一趟, 有好多甜點都冇食到. Mo Bar的high tea是以甜點作為主打, 總括而言是賣相取勝, 對於我等不算是甜魔的人來說不太對胃, 冇revisit的意願.  坐車回家途中忍不住打給媽咪, 請她早些弄晚餐, 真係餓到我呢…….