靚媽P生日飯局@尖沙咀大喜屋

12-Jan-2013

 

不到一個月又去吃日式放題了…hehe, 我的瘦身計劃永遠只是得把口, 聽見去食日式放題便老豆姓乜都唔記得.   暴食地點是尖沙咀的大喜屋. 今次聚會是補祝靚媽P的廿五歲+N月的快樂生辰.

 

大喜屋真是有夠難book, 我早在一個半月前巳開始致電訂座, 打足兩日才能接通, 到接通左又話我個booking早得滯, 佢地只接受3星期前的預訂喎, 吹脹!  告訴靚媽P事發經過, 幸得壽星女主動提出佢負責訂座呢個難題, 我這個懶鬼當堂印印腳.

 

晚間放題分兩輪, 我們訂的是6:00pm-8:30pm那一輪.

 

下午先和心急人S去逛街, 陪她買護膚品, 逛到最後一分鐘, 一仆一碌咁去文遜大廈5樓. 搭電梯條龍都幾長, 巳經有十幾個人在前面排隊了.

 

很快侍應便領我們到坐位, 嘩! 迫到呢, 似難民營. 冬天又著得多衫, 要閉氣先可以攝埋位. 同之前去碗屋的環境爭好遠.  不過咁, 其實大喜屋是有卡位同幾個馬蹄型的卡座, 睇起來坐得較舒服, 不過我地並沒有被安排到.

坐下不久靚媽P便到. 大喜屋真貼心, order紙中英對照, 不懂中文的心急人S都可以睇得明. 她負責幫我們點飲料

這是我的玉泉+C檸檬 – 第一次飲, 原來都幾甜架

還有其他的order紙

最先上桌的是刺身拼盤. 靚媽P極力推介甜蝦, 果然大隻又鮮甜

唔食刺身的心急人S口巷巷, 正當我和靚媽P大啖刺身時火炙壽司剛好送上. 這兩款是火炙帆立貝及炙三文魚醬油漬, 傳過去給心急S放兩件入口先.

汁燒帆立貝甜甜地, 沒有煮過火, 滑嘟嘟. 不過大粒d仲好.

花之戀同蟹膏甜蝦就幾失望. 甜蝦似蝦米咁細, 蟹膏又好腥. 花之戀塊三文魚又薄左d.

跟住來了一輪燒物. 先來燒蕃薯仔 - 普普通通. 記得喺"大吉"食過, 好食d, 甜d

鹽燒冬菇 – 一d味都冇又唔juicy. 應該叫乾燒冬菇

鹽燒牛舌 – good呀, 熱辣辣. 食左一串咋, 太飽冇encore添!

鹽燒雞翼 – 皮夠脆, 不過就燒得老左少少

焗廣島蠔– 雖然蠔肉經過烤焗後收縮變細粒, 但烤焗時間撐握得好, 蠔肉仍很嫩, 蔬菜配料都唔馬虎了事, 切得細細粒易入口

鹽燒蝦 – 冇食到, 不評論

此時, 一向做事勤力盡責程度如劉華的A妹帶著女兒小K趕到. 時間過得真快, 上次見小K是她剛出世, 今番再見巳是五歲的可人兒了, 精靈可愛.

 

A妹來到, 立即再order一盤刺身. 大喜屋的刺身水準很好, 又切得夠大方

呢個牛油甜粟我地order左3次, 真係超好食. 每次上桌都熱辣辣, 牛油的香氣和粟米的清新平衡得很好, 大家都冇搶大家的鋒頭

汁煮東風螺 – 都是大路和食的口味, 甜甜地咁, 覺得不俗但不會encore.

巳經飽到反肚, 不知何時靚媽P又寫了疊紙, 見到又大堆食物上桌, 我都要抖一抖, 落下隔先至可以再上戰場

枝豆 – 平時d日本料理會烚完之後洒起粒鹽花吊味. 呢度似乎就咁搵水烚, 唔記得落鹽咁, 冇乜味, 但唔難食既

柚子蝦沙律 – 我只食左一粒車厘茄, 不能下評語

蟹籽沙律 – 成碟都係青瓜絲, 大家都唔係好啋佢

茄汁牛腩鍋 – 呢味菜其實幾惹味架, 牛腩又煲得淋. 可惜自己太飽

軍艦卷 – 食左一粒, 無深刻印象, 不過不失

蟹粥 – 入口好鮮甜, 嗒真d, 又是味精的功勞

蒜片牛肉粒- d牛肉食得出用梳打粉拿過, 唔係幾鍾意

“開胃啦”食評 –心急人S曾做過餐飲業管理, 她眼見大喜屋侍應的繁忙程度, 口中一直唸唸有詞”呢度d turnover一定好勁架啦”.

 

當然我也親眼目睹每一位侍應都忙過不停, 之前去碗屋巳覺得那裡的侍應很忙碌, 但原來一山還有一山高. 可能大喜屋的價位較親民而食物水準不賴, 所以生意是非常之好. 如果大家有耐性打電話book枱同唔介意在咁迫夾的環境下進餐, 不防一試. 順帶一提, 雖則工作繁忙, 這裡的侍應態度還是保持良好. 其中一位女侍應仲主動送朱古力糖氹小K開心.  來過一次的靚媽P話, 中午食得舒服d, 用餐時間仲係3個鐘添! 搵個時間同爸媽來試下.