2012 Christmas Eve Dinner at 碗屋

24-Dec-2012

 

今日心情特別愉快, 因為一早便收到包神K小姐送給我的聖誕禮物(仲要係人肉速遞). 我不是貪小便宜的人, 但很窩心原來包神K一直記掛著我隨口up的說話. 話說好耐之前我曾經隨意提起過好想擁有一個tea set架. 我真係隨口up冇風濕, 講完都唔記得左自己講過乜, 但是原來有人一直記掛在心.

以光速步行回office, 急不及待拆禮物. 我這個鈍胎, 砌了好耐才砌好. 係咪好靚呢!  K小姐多謝的心意.

 

今日可以放4pm, 不過我都冇早走, 巡吓blog先. 5pm就搭地鐡落中環, 因為今晚約了家人在碗屋吃日式放題, 多謝家姐安排一切. 以前在中環上班, 久不久都會去碗屋吃午餐, 自從3年幾前公司搬去太古之後都冇食過碗屋了.

 

非節日$398 +10%一位, 可以由6pm食到10pm. 是日聖誕佳節每位加多幾十蚊(實際金額唔太記得)兼要分兩輪吃. 我們訂了吃第一輪, 即是6pm-8pm.

唔好咁多口水,   馬上去片~

 

銀鱈魚 – 熱辣辣滑嘟嘟, 好好味呀. 我們encore了最少三次. 平時買一塊銀鱈魚都幾貴, 幾大食多d.

海胆手卷 – 基本上是成家人的”飛佛”.  Encore了N次咁啦.

赤貝拼帶子刺身 – 鮮甜冇比

家姐話鐡板薄燒牛肉好食d – 果然好好味好juicy喎, 廚師手勢一流, 煎得僅僅熟, 面頭又脆脆地

鐡板炒雜菜 – ok! 不是不好味, 只是鋒頭被其他菜式搶晒, 變成輸在起跑線!

燒羊鞍 – 哈哈, 係我呢個唔食羊既人點架. 我班好朋友個個都係羊痴, 咁我試左好味都可以和她們分享食評嘛. 肉質鬆軟唔黏牙, 真係唔錯, 完全冇我討厭的騷味.

我承認呢碟鵝肝多士好樣衰. 佢雖然外表醜陋但廚師把它們煎得外脆內軟架, 我好似吃了兩件.

細佬遲到, 佢來到再點一個刺身拼盤. 我當然有抽水啦!

蝦天婦羅 – 我冇食到, 唔見家人encore, 我估味道應該……. 本人是個怪咖, 不太愛吃蝦天婦羅, 但就好鍾意用蔬菜整的天婦羅, 例如冬菇, 蕃薯, 南瓜, 芋頭之類.

清酒煮青口 – 呢味煮得太老身了

海胆凍豆腐 – 好refreshing, 我like

呢個蕃茄野菜窩家姐強力推介 – 果然冇介紹錯. 啖湯濃淡得宜, 新鮮雜菜又夠多, 我細佬好鍾意. 要求encore.

燒粟米– 唔駛講, 梗係好食啦

燒蕃薯 – 我冇食到, 所以俾唔到意見

燒雞翼 – 我自細鍾意食……呢個有點失望.  外皮實在燒得好香脆但係就冇味囉

鐡板厚燒牛肉 – 家姐話呢個冇薄燒咁好食. 不過我地都照點, 係冇薄燒咁好食, 因為佢有少少騷味

除了order紙上面的菜式, 每位客人還有一個主菜另外奉上(即是不能任點).  呢個係牡丹蝦拼toro. 我影相攞角度攞得唔好, 片toro藏在牡丹蝦後面.

磯煮鮑魚 – 家姐揀的.

我揀左蒸龍蝦. 咪睇佢細細隻, 都好好肉地. 蒸的時間拿掐得很多, 肉很嫩滑呀

甜品是雪糕. 可選芝麻或咖啡, 我選了咖啡. Ummm….唔似日本雪糕喎, 咁似維記既?

差不多吃完, 女經理向每一位客人派禮物, 估下係乜東東? 答案在頁底找

個個都飽到嘔電, 所以埋左單便出去散步幫助消化, 順道睇下燈飾.

 

Landmark的cable car造型好掂呀, 真懷念以往在Landmark返工的日子. 靚人靚衫靚景. 太古呢度乜都冇…….

"開胃啦"食評: 日式放題在香港很受歡迎, 每隔幾個月便見有新餐廳出現. 這些年我暫時只拜訪過大吉, 吉壽, 松屋, 石澗和今趟的碗屋.  雖然碗屋的菜式選擇只有50項, 不算多. 但總括而言大部份都是好吃而且食材新鮮和優質.   可能閣下睇左段會話我講廢話, 碗屋的價錢貴一大截喎! 但是碗屋坐得舒適, 洗手間清潔乾爽. 還有最重要一點是服務人員的待客態度.  忙到頭暈還是非常有禮貌和保持耐性, 相信是他迄立不倒的其中一個原因.  石澗的招呼也不錯但其餘幾間的侍應就很多都愛擺臭臉, 認為來吃放題的客人都是cheap友.  希望他們巳改善吧!

答案: 禮物很有意思, 是環保筷子一對. 質地仲好好添!