後會有期 ~ 糖衣杏仁

31-Jan-2013

  

今天要離開工作了接近6年的工作環境. 這陣子都想著做甚麼小點心送給我親愛的同事作道別禮. 平時食過唔少散水餅, 但好多時離職同事都成四點幾五點先至派餅. 有幸食餅的同事個個笑著收下, 不過眼見唔係靜雞雞掉落垃圾筒便是食一半掉一半, 我覺得好浪費. 當然, 大集團的出品唔好味都係其中一個因素.

巡blog搵靈感, 俾我見到T&P 這個糖衣果仁, 我覺得直情有叮一聲的感覺. 就係佢啦! 杏仁一來有益, 二來又可以留得, 唔似蛋糕要馬上KO. 

一共做了4次, 每次也稍為改動配方少許. 我覺得鹽味唔係好夾, 可能我屋企d幼鹽都係太大粒, 間唔中咬到粒鹽好怪.

 

所以第二, 三和四次整都冇放鹽了. 玉桂粉我本身唔like所以每次都冇放. 第二次整我加入云呢拿香油1/2茶匙提香, 結果都好夾. 第三次整, 醒起包神K送我的焦糖糖漿, 不如用來試下夾不夾味道. 點之又好夾喎!

 

呢款果仁做來過年時招呼來拜年的親友都唔錯架.

 

材料又係好簡單咋!

材料	份量
蛋白	19克
凍水	1/2 茶匙
焦糖糖漿	1 茶匙
原味杏仁	300克
砂糖	55克

做法:

蛋白略打發

加入凍水打勻

加入焦糖糖漿打至濕性發泡, 約6分發便可

把杏仁加入打發蛋白內

用刮刀拌勻

加入砂糖, 拌勻

把杏仁舖平在焗盆上, 放入巳預熱115度焗爐內焗55分鐘即成

烘焗期間每15分鐘, 需用刮刀反一反杏仁使受熱均勻

出爐攤涼, 完全涼後放入玻璃瓶內保存

呢款果仁真係好好食, 焗又冇炸咁熱氣. 我唔算係果仁粉絲都食唔停口.


送給同事當然要包裝好佢啦


希望大家唔好嫌棄啦