18-June-2013
呢期讓我甩最多腳毛的都方都可以算是圓方.
我一向覺得圓方位置好吊腳, 入面賣既都係上等人既嘢, 我等死窮鬼入去只可以嘆免費的冷氣.
我親愛的阿姨由於居於九龍區, 所以佢好鍾意來圓方消磨時間, 據她所說, 原來只要在圓方消費幾百蚊, 就可以享4個定6個小時免費泊車, 幾筍架.
由我家去圓方都唔算好遠, 坐過海車, 一過左西隧道收費廣場第二個站落車便是, 跟住走上行人天橋就可以入到去圓方商場.
阿姨是戲迷, 佢吩咐我做先頭部隊, 去睇下有乜嘢好戲正在上影. 圓方兩間戲院都係位於"木"呢個區域度.
先去阿姨至愛的StarSuite戲院. 問過職員, 最快果場係4:00pm的"醉爆伴郎團3"同埋6:00pm的"非常盜".
跟手再去埋Grand Cinema睇, 呢度有咁多間影院, 選擇自不然多很多.
約左某人2:30pm, 但某人2:30pm才打電話來話而家開緊車從荃灣出來
. 無計啦, 唯有週圍mc貢下. Grand Cinema的小賣部是位於場外的, 就算唔睇戲都可以幫趁佢地買爆谷食.
我平時較為喜歡去銅鑼灣的總統戲院睇戲, 佢地d焦糖爆谷好好食架, 細盒裝才$20.
咖啡精阿姨的"鐡竇"是Caffe Habitu. 我冇佢去咁密, 今次才第四次幫趁. 之前幫趁過幾次都係坐餐廳內, 不過好鬼凍架, 都係坐室外的座位舒服d. Caffe Habitu的飲料都幾"乸脷", 反而食物就好抵食, 正正是便宜又大碗.
我最近像自自然然地戒晒咖啡同奶茶(是鬼上身嗎?), 所以我只點口味清淡的熱飲. 這是我的passion fruit lemon tea ($36). 好味, 酸中帶微甜
而家巳經係3:00pm了, 我當然巳吃過午飯, 實在沒有胃納吃東西. 這是阿姨的ceasar salad.
再來是阿姨的回魂啡 - 中杯裝 latte.
本來冇點阿姨的至愛 - 厚多士($14)的. 佢次次來都要點上一客, 咁我食到飽晒, 根本唔想再食, 但見佢lor lor luen個樣, 於是我便提出幫她吃一塊, 那麼她便可以達成心願. 雖然我都知$14一份的多士無可能用天酵烘焗出來, 但佢的確香脆鬆軟. 順帶一提, 多士是不在餐牌內的, 要同侍應講.
食飽, 吹完水就去買戲飛
一早都估到韓劇迷阿姨想睇果套韓片"戇爸的禮物", 咁我當然樂意奉陪. 呢套戲果然好好睇, 溫馨攪笑得來又令到觀眾係咁流馬尿.
散場, 阿姨又話想食雪糕. Godiva的雪糕很有名, 不過我就一次都未食過. 每杯$39, 真係好貴啊
正想拍低照片時被女職員阻止, 攪到我個鏡頭out晒focus添. 左面的是阿姨點的milk chocolate口味, 右面果杯是我的dark chocolate口味.不過我覺得好甜呀, 應該唔會再食.
.其實臨入場前有20分鐘空檔, 阿姨再次發揮了她的購物強項, 買了今季第N個包包. 約左表姐7:30pm食飯又未夠鐘, 於是我兩便食住雪糕行去停車場, 把她的戰利品先安放在車子內.
個幾月前都食過稻成阿丁一次, 果次印象都唔錯. 佢好好生意架, 所以我有預先訂座.
關於- 稻成阿丁(原為稻城, 阿丁). 稻城同阿丁其實係2個地方, 而呢2個地方都係位於四川省內的著明風景區, 好多龍友都會在十月份的時候去影秋天的景色. 我睇過一些照片, 簡單講就是仙境, 複雜d講, 都係仙景.
餐廳是半室外的, 裝潢都傾向於簡約. 牆壁上掛有多幅清朝美女的晝作
前菜是一碟類似咸菜的東西, 我冇食過. 這碟咸菜要收錢架, 承惠$15!
我地三個"擦家", 連甜品在內, 一共點了8道菜.
先上桌的是涼拌雲耳. 清新開胃, 不能愈食愈咸. 醬油似乎下太重手了
口水雞 - 今次食覺得佢冇乜味. 包括冇雞味, 冇麻味同埋冇辣味.
孜然串骨- 上次食過好好食, 所以今次encore. 味道依舊但係肉好似少左d. 好似一件肋骨, 劈開成2件咁.
窩塌豆腐 - 同menu個樣差好遠. menu內看到的是乾身的, 呢碟一上桌見佢濕淋淋都冇乜好感, 仲要亂七八糟, 我係用筷子先執好個樣先至影相架. 不過食入口都算幾好味.
水煮蝦($168) - 麻麻地, d蝦用梳打粉嗱到嗦嗦聲, 冇厘聞味, 仲好油膩呀. 上次食水煮魚, d魚肉反而幾嫩滑
素餃 - 餐館方面上菜很快, 所以我地吩咐侍應留著蒸籠蓋. 到我地食時都凍晒lu. 如果熱辣辣吃掉的話, 應該不錯的.
沙鍋什錦. 又係好快上桌, 所以我地再請侍應留著沙鍋蓋子, 先不要取出. 不過到我地食果陣都巳經凍晒, 其實啖湯都幾甜既, 但湯一凍就大打折扣. 最難食係果幾粒魚蛋, 腥到無論.
豆沙窩餅 - 本來表姐同阿姨都想食高力豆沙, 但我之前睇過openrice, 有食評話唔掂, 另一人就話豆沙窩餅好食. 點之我地就中伏啦
註: 兩次幫趁, 都留意到佢地生意好好. 可惜今日水準麻麻. 如果餐廳可以把持著水準, 都會考慮再幫趁.
稻成阿丁
地址: 柯士甸道西1號圓方商場1047號
電話: 2196 8699
沒有留言:
張貼留言