29-June-2013
昨晚的加工肉醬, 只係買左10蚊豬絞肉啫,
煮好又變成一大兜,
一個人根本無可能食得晒,
結果又要放入雪櫃,
諗下點解決佢.
記得小時候食飯梗會食到天一半地一半, 好似個下巴有”lone”咁.
嫲嫲見狀就會話我地無衣食
飯碗食剩飯粒,
大個就會變豆皮婆.
靈機一觸, 不如用來整熱狗啦,
我見d鬼佬賣熱狗,
除了一條腸之外,
還落一大pat肉醬.
熱狗包自己焗唔切架啦,
嘉X牌(又稱X頓牌)既熱狗包我又嫌佢鞋烚烚,
通常我想食熱狗果時, 就會去麵包店買幾個咸豬代替, 省時方便.
咸豬放入焗爐, 用低溫翻熱
肉醬加少少熱水, 用細平底鑊加熱
27-June-2013
今晚爸媽都有節目, 叫我自己攪掂晚餐.
天口熱,
加上又得自己一個都費事大費週章.
摷下屋企有乜廚餘再炒埋一碟又一餐.
罐頭櫃 –>
有1/3包螺絲粉
雪櫃 –>
有半個洋蔥,
還有一盒燉肉汁(早幾日整蕃茄燉牛肋條,
肉就被清倉,
剩返好多汁(冇用”蒜”過既筷子掂過架)掉左佢好浪費,
所以就儲左响雪櫃囉)
去超巿買盒豬絞肉, 醃一醃味. 爆香洋蔥絲, 加埋豬絞肉落個汁度煮滾,
淋落巳烚淋的螺絲粉上面, 再在表面洒些mozzarella
cheese 碎, 放入焗爐用高火, 焗到佢焦焦地就得
咁又一餐, 係咪慳王之王呢!
個靚靚鍋仔係舊年10月去澳門時買的葡式沙鍋仔, 等左8個月, 終於可以粉墨登場了
23-June-2013
姐夫嗜好品嚐紅酒, 久不久便見佢拎幾枝返屋企. 他對於紅酒持開放態度, 有名氣酒莊的出品佢會買, 名不經傳的酒莊或是一些被稱為”新世界”的紅酒佢都會買來試下, 好多時平嘢都有好架
早幾日在家姐屋企吃晚飯, 姐夫就開左一枝阿根廷出產的紅酒, 幾十蚊貨仔. 但佢話唔好飲, 要掉左呢枝”乸脷牌”. "乸脷牌"是我家的暗語, 意指難入口, 太乾, 太酸的紅酒
馬上9秒9制止姐夫! 叫佢俾左枝紅酒我用來煮餸, 無謂益大口仔吖嘛.
紅酒搭牛肉最匹配, 但係早排先至整過紅酒燴牛尾, 唔想冧莊. 醒起去年在廚神G的步落格見到呢個蕃茄燉牛肋條食譜就流晒口水, 在康怡吉豬島超巿見到呢盒蕃茄燉肉醬就二話不說買左, 可惜被我打入冷宮良久, 大半年後的今天終於大派用場.
我屋企人多, 所以成包牛肋條一次過煮晒
仲有大量蔬菜配料
去廚房換隻碟, 補番幾個shots, 影出來的效果深色好多
22-June-2013
小孩子的時候很討厭榴槤的味道, 總覺得味道像極在漏石油氣
至於幾時開始懂得欣賞榴槤, 其實都唔係好耐之前, 我諗…..唔夠10年. 早年減肥減到身體壞晒, 成日面青口唇白
初初”中毒”時只可以吞一小件, 慢慢”毒癮”漸深, 可以一口氣鯨吞三大件添呢
而家一到夏天就心思思想買榴槤來吃. 當季的時候大約都會吃兩至三次, 唔敢咁瘋狂, 始終糖份很高, 多吃增磅.
有時媽咪買了好大一個, 吃不完的話我會拿來做甜品, 不過媽咪就話唔食榴槤的副製品. 咁我就話"芒果布甸你又食?", 有人無言.......
到惠康的泰國榴槤做特價, $6.5/磅, 我買呢個重7.34lb, 即係$47.69 (街巿都唔只賣呢個價). 於是求其揀左個. 拎到返屋企, 媽咪仲話我個榴槤應該冇乜肉
明代醫藥學家李時珍所著的<<本草綱目>>中有指榴槤: "可供藥用, 味甘溫, 無毒, 主治暴痢和心腹冷氣". 而現代的營養師則認為榴彈脂肪含量高, 但其實每100克中只有約1茶匙油, 還要是有益身體的不飽和脂肪. 另外, 其纖維含量每100克也有3.8克.
這些數據看來也不是太恐怖啫, 只要唔好誇張到成個榴槤咁啪, 應該不會是導致閣下心臟病的元兇.
11-Mar-2013 (Mon)
Luang
Prabang
(是日行程: 清晨布施, Wat Xieng Thong , Morning
Market, Phosy Market, Dara Market)
休息了兩小時, 大約11:00am又再出動. 打算走路去位於古城外圍的Phosy Market逛逛, 看過地圖, 由我的旅館出發, 一直向右行便會到達.
一路行, 都見到好多台名貴車輛, 直駛向同一方向, 路上還有一大堆警察神色凝重咁. 突然間, 我被一個警察截停, 他示意我停一停. 原來那幾台名貴車輛都要駛入這棟建築物.
注意到下車的人並全是老撾人, 有華人, 有西人. 我估呢度係一個政府部門, 剛好正和他國的貴賓在這裡開會. 趁警察唔為意, 我偷影左呢幅相.
Bureau of Lao Administration. 唔知係咪老撾一個好重要既行政機關呢?
也不過1分鐘左右, 警察便把我放行. 咁我就繼續我的行程. 再行冇幾遠就見到一個紀念埤, 不過閘門沒有開, 可能今日唔開放俾人參觀.
應該是為紀念一位名叫Kaysone Phom Vihane的前總統而建造吧
足足步行了25分鐘才到達, 呢段路不好走, 沒有行人路, 一直要閃避往來的車輛, 都幾危險
Royal Museum後面的Morning Market主要賣食物, 而
這個Phosy
Market範圍則大很多, 大約劃分幾個關於衣食住行的section.
先逛室內部份. 第一樣影入眼簾的都幾失望, 唔駛問阿貴都知係國貨. 情形就好似舊年去烏茲別克咁, 去親每一個巿集, 全都在售賣價廉質劣的國貨. 可能貧窮國家真的很需要便宜的祖國貨.
電器用品, 很喜歡這個紅卜卜, 類似電鍋的鍋子. 需知道一般老撾人的家庭都是炭火煮食, 所以會買廚房電器的, 多數是富裕一族或外地人.
外國進口的洗頭水, 謢髮, 謢膚等女性日用品
都有賣輕食的攤子
賣拜神祭祀的用品
室外部份就是一撻爛地. 十室九空, 只有一, 兩檔賣衣服的
可能期待太大, 失望愈大, 這個號稱全Luang Prabang最大的巿場, 雜亂無章, 很沒趣味, 逛了15分鐘便失去耐性打道回府. 況且明天報了名的烹飪班, 相信導師會帶學生再來.
巿場對面有兩間家品有我喜歡又唔買得返香港的東東.
超級kawaii的有腳砧板. 之前巳出場過一次. 在這裡又跟它再打個招呼.
不同形狀的家用炭爐. 幾十年前, 香港都很普遍, 自從轉了氣體煮食, 呢類炭爐幾乎巳絕跡.
早在一世紀前, Luang Prabang巳有華人前來搵食, 所以中文字在這裡十分常見, 很多大型企業或餐館都是華人開的.
男士理髮店. 老闆見我舉機還給我一個回眸淺笑
Dara Market地理位置最優, 位於古城的中心, 歷史比Phosy
Market悠久. 看樣子, 這個巿場剛翻新不久, 還有部份工程尚未完成. 是比Phosy Market好逛和企理, 不過入面又係十至九空, 無甚參觀價值, 可以不理
小孩子穿的傳統老撾服飾. 不過直至我完結成整個老撾旅程, 都冇見過細路仔著. 多數都係成年女性才會穿著傳統服飾.
行下行下, 見肚餓, 睇下隻錶, 原來巳經差不多12:30pm. Luang Prabang係好熱好焗既, 行一陣巳汗流浹背晒, 條脷都伸埋出來.
古城週圍都有炭烤外賣店, 但以這檔位於Kit Salat Road最多人幫趁. 我都唔執輸, 買左一條烤魚同一串烤豬腩肉.
烤魚的肉很嫩, 很好吃, 之前在Sam Neua吃老撾式打邊爐都食過一次魚, 不過一客得果幾舊. 好想成條自己KO左佢.至於果串豬腩肉, 就烤得過熟了. 其實所有燒烤店或攤子, 老板都會把食物烤得半熟, 然後排好在蕉業上, 讓客人自己挑, 鍾意邊串就揀邊串, 在香港應該會被老板鬧爆.
呢條魚(25,000K)同串豬腩(10,000K)肉都係我自己揀架, 我見d本地人都係揀完就自己拎上個炭爐度燒, 仲要自己睇火, 燒好就話俾老板知, 等佢幫你拔掉竹籤及用膠袋包好.
拎返去旅館, “戙”起隻腳慢慢嘆先………
抖到3:00pm又再出去行過. 先去郵局對面的Tourist
Information Centre睇下有乜筍料攞先. 答案係”冇既”, 資料都幾過時, 仲要限住人留在中心內閱讀. 一個全國最著名的旅遊點, 居然個遊客諮詢中心咁雞.
開放時間甚短.
好強烈的MSG後遺症, 口渴都想死, 一定係頭先果條烤魚同烤豬腩肉, 又中伏! 一時忘記老撾人連飲水都落味精.
去返前日到步時幫趁過果間小店, 坐低點杯watermelon fruit shake(5,000K). 原來西瓜都可整奶昔, 又幾夾味喎.
之後去左前日買Kuang Si Waterfall package同 前往Vientiane車票果間旅行社, 諗住攞車票同埋用佢地既電腦上網.
點知佢地d電腦仲慢過烏龜, 唯有去佢附近間網吧上網, 速度超快. 我大概用左1個鐘, 費用7,000K. 老撾上網真係好平.
上完網大約5:45pm, 趁未天黑就去行夜巿. 其實我昨晚都行過, 只不過昨晚沒有拿相機出去, 所以未能拍照.
夜巿其實就是Royal Musuem前面一帶, 由Sisavangvong Road直伸延至 Sakkaline
Road, 都幾長架. 商販大約5:00pm便開始架起帳篷, 9:00pm就收攤的了.
全國就只有Luang Prabang同 Vientiane呢兩個大城巿有夜巿. 但呢度既所有嘢我都覺得買唔落手. 全部一睇就知貨品來源係來自鄰國泰國, 越南的紀念品. 仲要賣得唔平, 咁就就無謂拓餐死啦
本來幾鍾意呢幾頂色彩班瀾的帽, 一拿上手, 重到呢, 我驚戴左會頭痛
返回旅館途中經過這家士多, 在這裡先買了一罐檸檬七喜, 6,000K罐. 跟住就結束今天的行程了
