悠遊澳門(怒買記) ~ Day 1.....Part 1

 

2-July-2013

今次題目改為怒買記是因為是次旅程真的不算食得多嘢, 家中兩寶都是細食之人, 結果最後係個旅行袋滿載而歸而不是個胃.

 

坐11:00am的船, 12:05pm泊岸. 過海關也很快, 大約12:15 pm便可以離開碼頭去找酒店的接駁車.

 

點之去返老地方搵車, 居然巳變陣. 上次去澳門是去年10月, 只是8個月的光景, 酒店車現在全部都要泊在碼頭對面, 所有旅客都要穿過一條地下隊道便可以到達.

 

我訂了葡京的”葡國餐廳”午膳, 所以便乘坐葡京的發財車, 不用5分鐘便到. 不過餐廳的位置很吊腳, 我們花了差不多十分鐘才找到.


餐廳位於舊葡京西座的三樓, 第一個感覺是"好暗"




整間餐廰的環境就比較暗, 樓底較矮, 沒有Robuchon那麼開揚, 可能是位於3樓, 又面向横街的關係.


因見到呢張咁長既枱, 都估到陣間有大group, 所以我們被安排較入的桌子, 由於光線不夠, 所以影相有難度.



我們的桌子是不靠窗戶的, 這一列的桌子都是圓桌, 坐位呈馬蹄型, 一半座位是梳化型的椅子, 另一半是普通椅子, 一共可坐四位客人.


餐牌只有一個, 巳包含午餐及精選套餐及a-la-carte.


之前在網上爬文, 巳知道他們的餐點份量頗大, 加上餐廳聞名的自制麵包, 女士們吃2 courses set lunch一定夠飽.  出發前在他們的網站巳睇過午餐menu, 但去到現場又改了一個新的.  2 courses with dessert $280 per person, 3 courses with dessert $350 per person.


先送上桌的是一碟牛油. 左邊的是普通牛油, 右邊白白地色的是餐廳自制的香蕉牛油, 雖然都唔係好食到香蕉味, 但創意值得欣賞.


熱烘烘的香蕉麵包上桌囉


正如網友所言, 香蕉麵包嚐不到香蕉味, 只有淡淡的甜味, 但麵包本身鬆軟無比, 的確好吃. 看! 組織多綿密


還有一籃, 兩款外脆內軟的葡式麵包, 左邊的切片包夾了一粒粒的西洋腸, 非常香口. 我本來先吃右邊的圓餐包(只吃了約1/4個), 都好好食, 但一食左邊那片便立時比了下去.

食完麵包巳經覺得飽了7成!


每餐廳方面會先為每位客人奉上一道清清口腔的頭盤.  這道頭盤共分成四層, 最面層是一片網紋脆片, 接著是甘筍茸, 栗子茸及鴨肉紅酒煮. 好吃.


我選了作為Asparagus Soup with Shrimp Cake作為我的starter.  中間有兩隻蝦, 而蝦餅則藏在湯內.  不論蝦或蝦餅都吃得出是新鮮的海蝦, 而露筍湯是忌廉湯底, 但就不膩口, 不錯.



媽媽和阿姨同樣點了Bacalhau and Smoked Salmon Egg Timbale. 媽媽分了一點點給我, 馬介休和煙三文魚的味道很夾, 初頭以為會好咸, 但佢又味, 算是恰到好處. 我覺得佢份量大到可以做main course呢, 我媽只吃了一半咋!  敗家!


是我的主菜, Skate Wing with Olives, Potatoes and Onions. Skate中文是魟魚, 即是我們俗稱的魔鬼魚, 不過魔鬼魚的英文是stingray, 咁我都唔清楚兩者的分別. 講返我呢道主菜, 其實是吃魔鬼魚的"翼".

魔鬼魚我不是第一次食, 由於其魚肉味道不明顯, 所以一般煮法都會以濃味的醬料一起去烹調, 星馬一帶最流行. 我點吃魚的目的是想吃得清淡, 可惜我就只覺得佢無厘聞味, 好似烚咁. 整頓飯下來, 最不欣賞是主菜, 舊魚又唔熱, 倒是碟底的馬鈴薯片很好吃.


媽媽點了Roasted Quail with Mushroom and Sausage. 嘩! 阿媽再次發揮敗家精神. 這道菜, 她只吃了1/5咋! 不過佢話好鬼咸, 食唔到. 其實呢道菜係將d肉同磨菇攪爛, 再釀入鵪鶉腿入面, 是功夫菜. 不過味道認真麻麻, 可能不合中國人的脾胃.

 
阿姨點的Braised Beef Short Rib with Portuguese Red Wine.  平時不吃肉的阿姨點這道菜時巳讓我眼核要跌出來. 到上桌時發覺是巨大無比的的牛肋肉連骨, 不是平時在凍肉店見到切成一片片, 中間有3舊骨那種.  阿姨又分了一些給我, 肉無疑是燉得很酥軟, 不過我覺得好大陣肉的臊味呀, 尤其是攤涼左先吃, 果陣味更勁.


甜品車上有9 款甜品讓客人選擇. 另外還可選擇雪糕, 口味有云呢拿, 朱古力及草莓雪芭.



阿媽及媽媽都飽到嘔, 所以都選擇吃云呢拿雪糕. 而我雖然都係飽到嘔, 但就唔想放過食甜品. 老實說, 他們的甜品不是很吸引.  我最後選了peach and almond cake, 還有egg pudding.

最後證實我的視覺不比我的味覺弱. Egg pudding非常硬, 可能這是傳統葡式布丁的做法, 但我就唔慣口感咁硬實的布丁.

至於個peach cake, 我嫌杏仁味太濃, 濃到有點苦, 完全蓋了peach味. 而且個脆脆餅底用了變壞了的杏仁制作, 好大陣油隘味, 吃了兩口便無法繼續.


我巳戒了咖啡及奶茶, 所以單尾的的餐飲我要了檸檬茶


媽媽和阿姨就要了咖啡. 阿姨平時飲開奶味重到無倫的latte, 所以佢嫌咖啡太濃. 而媽媽就剛好相反, 佢話唔覺得好濃, 咖啡味啱啱好


伴餐飲的小點是迷你葡撻, 朱古力餅及三角形的椰子餅. 本來不抱希望, 但估唔到葡撻同個朱古力餅咁好食喎又.


我之所以選Guincho a Galera, 完全是因為早前睇到鄧達智在蘋果日的專欄, 據他所說Guincho a Galera在葡國是很知名的餐廳, 知名度不下於巳休息業的西班牙El Bulli餐廳.

雖然我唔覺得菜式好似鄧生講得好食成咁(可能佢係名人, 食到既嘢同我地普通人唔同的關係), 如果水準上出現落差的理由是因為我們點吃套餐, 不是點吃a-la-carte, 我就覺得好難有翻頭客, 亦唔值得港客老遠坐船去食, 這樣水平的餐廳, 香港真的大把.

在吃甜品時, 年輕總廚Martino出來和我們聊天(我估佢喺廚房, 見到我地食剩咁多, 出來問原因). 咁我都有老實同佢講, 麵包同頭盤我地都好滿意, 不過主菜同甜品就唔係好掂啦.  總廚通常拿筆多過拿鑊鏟, 佢點會親自落場整set lunch丫, 應該是他的下屬功力問題. 希望這位年輕的總廚可以好好管理及訓練一下.