2013生日飯第三擊@紅星餐廳

29-July-2013

今晚廚神K請我食飯. 人少少最好食西餐, 咁啱我地兩個都欣賞西式食物.

 

上星期同住喺北角的遊埠T食lunch, 佢介紹我去同區的紅星餐廳, 佢話啱啱試左都唔錯.

 

又上openrice睇食評. 原來紅星個老細在同一條街本來係經營一間同名的茶記既, 之後佢再下一城在同一條街開一間環境高級d餐廳招呼不同要求的客人. 咁就費事諗, 同廚神K去呢度試下.

根據openrice所登的地址是健康村2期UG10號鋪. 咁我咪一路以為間舖在英皇道囉, 點知行到去"北角大酒店"果頭都未見便打俾廚神K, 原來間餐廳既正確位置係位於七姊妹道同健康中街交界, 非常隠閉架.

約廚神K 6:30pm, 我就因為搵路而攪到遲晒大到, 真係very sorry呀


餐廳不大, 只有約7, 8張桌. 室內裝修傾向古典. 我最鍾意塊地板, 唔似用國貨喎


不過一睇佢點擺cutlery就露餡




我地坐卡座, 都幾舒服, 每張卡位仲有一盞水晶燈, 有點花漾年華feel


原來呢度只提供套餐, 冇散叫架. 咁我就老實不客氣, 叫左全店最貴的T骨扒晚餐($148), 而廚神K就要了烤羊架($138)

餐湯有忌廉湯同羅宋湯. 這是廚神K的忌廉湯


我的是羅宋湯. 湯煲得很香濃, 蔬菜很足料, 不過跟餐塊包超難食. 好鞋呀. 廚神K話佢地d包homemade個喎, 唔係下化!  不如我賣d包俾佢地好過


廚神K的羊架本來是鐡扒上的, 不過佢要求用普通餐碟上. 我就聞到好陣騷味嘞


我的T骨扒, 我要求medium, 算是做到.  不過肉質麻麻, 肥膏又多, 可以食用的部份約只有一半. 另一不是之處係果堆焗薯茸同埋塊扒都係唔熱架. 我向女侍應反映, 佢馬上叫廚房另外焗一個薯茸畀我.


餐茶我要熱檸水, 唔明點解佢地要用茶記杯上, 同間餐廳既裝修都唔夾



註: 食物認真麻麻, 遊埠T回港, 我一定要向佢投訴老點.  這店唯一好處是夠靜, 可以同朋友好好傾計. 最值得稱讚的就是侍應招呼細心, 有笑容, 有禮貌同埋廁所乾淨, that's all.