藍莓果醬DIY

 

 

19-July-2013

 

早幾日堂妹來我家, 送左盒草莓同藍莓做手信. 一部份的草莓俾我用左來整天酵, 而盒藍莓就郁都冇郁過, 家中兩老好似唔係幾鍾意食藍莓咁, 可能係怕酸.

 

實情我本人都是怕酸一族, 事關太多次買左唔係酸到盲公開眼就係淡荗荗唔想食.  早幾年學會整藍莓果醬之後, 酸藍莓就有出路唔駛投奔大口仔咁淒涼.

 

呢盒藍莓淨重250克, 但揀左d爆左或霉左既出來,
就得返200克!

材料	份量
新鮮藍莓	200克
糖	80克
檸檬汁	20ml

做法:

(1) 玻璃樽要放入鍋內以大滾水消毒15分鐘. 我通常最後果5分鐘先至放個樽蓋入去一齊消毒. 完成後取出, 放涼

(2) 藍莓洗淨,
晾乾水

(3) 藍莓和糖混合, 放入雪櫃醃過夜 (藍莓和糖混合前可將部份藍莓切半, 咁樣可以幫助出味, 但如果藍莓唔係大粒就無需咁就)




(4) 隔天從雪櫃取藍莓, 同時把新鮮檸檬榨汁


(5) 藍莓及檸檬汁同放入不沾鍋內


(6) 開小火, 全程煮15分鐘.  這是煮左一分鐘的樣子, d糖開始溶化


(7) 五分鐘後...........


(8) 十分鐘後........, d汁開始變杰, 會痴痴地枝矽膠匙


(9) 十五分鐘便可離火(離火前要試味, 太酸加糖太甜則加檸檬汁). 攤涼. 攤涼之後再杰d, 所以不能煮到冇晒水份, 否則放入雪櫃之後會變硬


(10) 攤涼後便可入樽 (200克藍莓做得半樽仔咋)


有些做法是離火後馬上入樽, 蓋好蓋子, 倒轉放, 再烚一烚佢添......話咁樣會消毒得好d同襟擺d!  不過我係懶, 次次都係攤涼左先入樽, 跟住入雪櫃.  放幾個月都冇事, 冇變味冇盛喎


藍莓果醬可以用來搽麵包, 整芝士蛋糕, 和雪糕或奶凍伴食都得.  這個製作果醬的方法很簡單, 同時適合其他漿果類的水果.  而煮既時候要不時攪拌但又唔駛不停咁攪, 因為d藍莓會攪到爆晒, 我唔係咁鐘意.

估下係乜? 紅酒? 提子汁? 利寶納?


唔好笑我核凸, 每次煮果醬, 其實都會有好多汁醬, 果膠類物體痴喺個鍋邊同枝矽膠匙度既.
 
咁我講得就咁拎去洗都幾浪費, 又冇理由搵條脷去lai佢架? 是我就諗左個汁都撈埋既方法.  我會落少許滾水落個鍋度, 慢慢"倘"個鍋, 咁就可以將痴喺鍋週邊的汁醬撈埋一齊(我都唔係幾識用文字形容). 跟住倒起d甘露佢, 攤涼後加適量冰凍梳打水一齊飲好好味架, 酸酸甜甜又有果香.