(補回照片)悠遊澳門(怒買記) ~ Day 2.....Part 2

 

 

 

3-July-2013

 

賭場就在Palm's的後面. 媽媽想玩角子機, 我地兩個大鄉里睇左好耐都唔明. 問個女職員, 原來角子機只收港幣唔收葡幣架, 經營賭場的人真是精甩尾.

媽媽求其揀了一台角子機玩, 放了一張HK$20紙入架機度, 亂咁撳制都贏左HK$16. 我地呢d無胆死窮鬼, 贏左雞碎咁多錢就雞咁腳去賬房攞錢唔敢再玩落去.  阿姨就坐埋賭枱玩左一陣black jack, 佢都贏左千幾蚊真係開心.  玩左半個鐘到就痴阿姨架的士坐, 我地在成昌超巿落車, 阿姨直接返回新麗華取行李.

 

每次來澳門, 如行程及時間上許可, 我都必定會去成昌朝聖, 事關佢地有好多款式的葡國食品賣, 仲要幾平下, 香港買唔到家嘛.

 
我在香港巳pack左2個冰袋來掃貨, 看看我的收鑊.

馬加休, 一公斤才MOP140


上面果包係葡國煙腩肉(MOP44.2), 係個凍肉櫃女職揀俾我地架, 佢話呢舊靚. 下面果條轉晒彎既係葡式臘腸(MOP49.9), 一磅要MOP64, 我見個櫃有其他葡式臘腸平一截, 我喺度諗會唔會呢隻腸靚d呢?


後補照片: (9-July-13) - 媽媽昨晚切左半包葡國煙腩肉用來整個小炒皇. 呢隻煙腩肉好味過上次在新苗買的, 這牌子的煙薰味很濃厚, 咸鮮味恰到好處又沒有帶酸的情況出現. 愛酒人士用來切片伴紅酒相信也很適合.


右邊果樽葡國青橄欖(MOP17.8), 以前我唔太鍾意食olives. 自從上次去里斯本地帶食飯, 餐廳送了一碟黑和青双拼的橄欖給我們. 我才發覺原來青橄欖咁好食, 所以見到買返樽, 香港的超巿冇咁平.

左邊罐蟹肉(MOP31.9), 細細罐, 用來整沙律啱晒. 黃色果盒係葡國名產沙甸魚, 平時食開老人牌多, 但見呢個牌子做緊特價MOP6.7就買一罐試下. 至於點解要喺澳門買三花牌辣午餐肉是母親大人傑作, 佢話香港賣HK$3X罐, 而呢度賣MOP22.4喎. 實情係百佳唔減價賣HK$28, 做特價就HK$23.  Anyway, 唔緊要啦, 我屋企人又真係個個都鍾意食.
`

買幾樣嘢都駛成三百幾蚊


好重好重, 媽媽話先把戰利品放回酒店寄存, 再去下一站敗過, make sense!

下一站去金燕買西洋牛油糕同蟲仔餅.  來過澳門旅遊百九幾次都未食過牛油糕同蟲仔餅呢兩樣咁有葡味的甜品.


蟲仔餅都有原味同芝士味, 有得試食, 我兩隻都食過, 兩隻都唔錯, 但我最後揀左原味. 除左蟲仔餅, 金燕仲有松子曲奇, 腰果曲奇等等.


店內還有代售其花品牌的食品, 例如昌記的咖哩油, 呢度賣MOP38樽. 最攪笑係個年青店東話俾我聽, 叫我去對面昌記老舖, 平d喎!


左起: 松子曲奇(MOP50), 蟲仔餅(MOP50), 西洋牛油糕(MOP65).  金燕的自家出品都幾貴, 我見過其他餅店賣蟲仔餅都係大約MOP40. 希望係因為佢地用靚d既材料, 所以至賣貴d啦.


後補照片: (8-July-13) - 西洋牛油糕雖然賣相係"零", 但味道都唔錯喎. 少甜煙韌. 縱使個名叫牛油糕, 但食落又無油淋淋感覺, 中間的果仁碎都頗有咬口, 對我來說是一道很新鮮的甜點, 如果手邊有一杯花茶搭配更妙. 

牛油糕要放雪櫃儲存, 店東教食前半小時從雪櫃取出, 室溫中攤半小時才可切件.


買完牛油糕就過對面昌記買咖哩油. 昌記雖然不是百年老號, 但都有幾十年歷史. 從澳門網友那裡得知, 澳門的各大酒店, 餐廳, 小菜館等等都是同昌記攞貨架.



昌記真係好易走漏眼, 佢門面就像一間古老士多, 賣下糧油雜貨, 香煙汽水之類. 佢地既主打咖喱油就低調地放在右手邊的玻璃櫃內.


大樽MOP29, 細樽MOP25. 我地買左一樽大既. 老板娘好好笑容, 好細心, 仲幫我地將個樽入落個發寶膠網內, 咁就唔會咁易打爛啦





星期六晚是姨甥女的生日party, 媽媽用左昌記的咖哩油煮左一大砵咖哩牛筋腩. 嘩! 真係好香好惹味喎, 咖喱香味濃過平時用開, 在成發買果d.  下次再去澳門一定要買多幾樽.


之後搭巴士去新橋區的軒記食魚湯粉.  每次來澳門都忍唔住一定要攝d時間去食魚湯粉, 皆因香港真係食唔到.  咁多年都食開雅馨的, 今次轉下場, 試下澳門本地人推介既軒記.


室內裝潢都是行簡約風, 地方光猛, 乾淨


叫左2個下午餐套餐(每位MOP28), 我要魚湯粉, 媽媽要咖喱雞湯麵

散叫就MOP21碗.


我幾時都話魚湯粉配凍麥精是絕配, 平時在香港成年都飲唔到一次麥精


這碟仔的東西便是洋蔥辣, 是免費奉送搭配粉麵吃的, 澳門網友提醒一定要開聲問, 你唔開聲, 店方係唔會主動俾你的. (老實講, 我唔覺得呢碟嘢有幾好食)


我的魚湯粉.  軒記的湯頭不及雅馨香濃, 但河粉就比雅馨滑好多. 不過軒記係配油炸鬼而唔係馬豆餅,. 比較下, 我都係鍾意食雅馨的魚湯粉多d, 剩係塊馬豆餅都贏晒.


呢個咖哩雞湯麵, 媽媽話好油, 佢俾左一件雞翼我食, 我覺得好鞋囉.  總括來講, 軒記的麵食是不及雅馨的.


上次來澳門食過怡文軒的微波鮮奶卷(MOP4)便念念不忙. 本來好想帶阿姨來買, 可惜她臨時有時要提早回港. 咁唯有我買左拎俾佢.


香港多年前都興過雪梅娘一排, 而家就連影都冇. 想食就過來澳門啦


媽媽係都要買一條呢d黃色一條條叫個日式德里浮XX(MOP7). 佢揀左栗子, 我食左一啖, 入面有超多我好驚既忌廉, 所以只係食左一啖就叫媽媽自己隊晒佢.


Da da.......佢地就係我既致愛, 鮮奶微波卷. 我等登帶一個手挽盒去買, 等d包包唔駛壓到扁晒


鮮奶微波卷入面一絲絲, 一圈圈好過癮.  軟熟唔在講, 食入口有濃郁的奶香味和牛油香氣, 肥人大忌! 


呢袋忌廉羅宋包(MOP7). 係等俾錢時見到既, 多手摸下佢, 見佢咁軟熟就買袋試下.


同鮮奶微波卷一樣咁軟熟, 不過牛奶牛油香氣稍遜, 但都係好食既. 有機會都會再買


循例都要扮下食環去街巿巡下


呢條街有好多檔燒臘檔, 唯獨是呢檔最多師奶排隊


對面果兩檔就拍烏蠅, 前面穿著藍色polo shirt呢位女士都可能係做媒, 好似平時見到在香港的街頭賣假乾鮑果d檔口咁, 梗有幾個師奶做媒喺度買鮑魚.


新爽爽的手打豬肉丸我又係恨左好耐想買來吃, 但次次總有理由來不了. 今次真是發毒誓一定要抬一些回港.


我買的是生豬肉丸, MOP44磅. 老板知道你會拎返香港就會幫你加些冰保鮮 


第二天巳急不及等拿在淥米粉吃. 賣相就普通了, 但一吃驚人, 真係好好好好食既豬肉丸呀, 彈牙又有豬肉味. 仲好味過三元的豬肉丸.  我又要發毒誓, 下次來澳門一定要再買返幾磅看門口.


後補照片: (8-July-13) - 心思思又想食. 今日又攞來淥米粉, 正呀


新爽爽除了豬肉丸, 都有其他嘢食架, 就好似一間茶記咁, 連多士, 豬扒包, 公仔麵都有. 聽講佢地既煎9菜餃都好好食架


是日最後一站 - 高士德新苗超巿. 上次來澳門, 因為住在附近的酒店, 所以有入去逛過下. 果次買左d葡式煙腩肉都覺得不錯. 今次再來, 發覺佢地既葡式食品都多左款式選擇.


上次見唔到呢d一片片既葡國風乾火腿(MOP34). 賣, 今次終於皇天不負有心人, 俾我見到, 一於掃幾包


仲有葡國芝士, 我以前都買過好多次, 葡國芝士真係又平, 又抵食.  呢款芝士才MOP55磅. 我切左少少來食都好好味喎, 有點似mozarella cheese. 我諗住用來整麵包呀





拎到手都斷, 荷包又乾塘, 係時候要回酒店取回行李及乘坐酒店的接駁車往碼頭


我同媽媽包車. 呢班車, 得我地兩個坐車咋, 爽!


眨下眼又結束2天澳門之旅了......