怒食澳門 ~ Day 2…..Part 1

10月25日 (星期四)

澳門的粥品一向口碑甚佳, 以往最愛到三元吃金銀丸粥(即豬肉牛肉丸粥), 今次本來都想去三元吃早餐, 但爬文時見富記在網上的評語很不錯, 最後忍著淚和三元說goodbye!

 

富記還有另一優點, 就是位置就腳, 在我們酒店附近, 腳程只是5分鐘而巳. 富記非常好生意, 只開早上, 所以想食趁早.

 

除白粥(即米王)外, 基本上所有粥同價.

雙拼都唔夠喉要加料? 又得啫! 老店很均真, 巳把價錢表列出來.

老友等食ing.

我點的豬膶肉丸粥. 粥底綿香富米味(這點好過三元, 三元的粥底就是太稀似粥水). 豬膶真係好得, 新鮮唔在講, 仲要好嫩又冇內臟味. 肉丸不似是手打, 粉下得較重手, 三元好食d.


油炸鬼唔知幾錢, 叫了一碟大家share, 份量約有一條. 可能炸起一段時間, 巳經唔夠脆身了.

富記粥品

地址: 高士德大馬路83號D (只有上午營業)

 

我是咖啡奶茶精, 朝早一定要嘆番杯coffee or tea. 本來我編排了2頓早餐, 食完富記過對面馬路的桃花崗的咖啡明飲杯藥煲咖啡食個奶油脆豬. 點知眼前巳變成了地盤, 唯有離開.   澳門發展一日千里, 老店關門是意料中事.

冇得飲咖啡就穿過巷仔行去紅街巿八下行情啦. 又會咁奇既? 晶記餅家只是在咖啡明隔壁, 但晶記這家老舖仍存在喎!  都好, 順道買埋手信.  圖中的男子便是晶記的老闆, 他待客非常有禮, 面上常掛笑容, 最like是他大方請客人品嚐他的餅食. 取價比享付盛名的”咀X園”和”具記”公道添. 晶記還有另一更大的分店在附近.

 

買手信時向老闆查詢咖啡明的下落. 原來咖啡明巳退休享福!

以前紅街巿門外有一檔牛雜粥好好食, 連澳門旅遊局都勁推. 我N年前食過一次都覺得驚為天人, 原來牛雜同粥可以做到朋友. 之後帶過好友S去食, 她吃後也念念不忙. 今番我兩舊地重遊, 但巳不見伯伯擺檔了, 我都相信他巳退休享福.

紅街巿內的海鮮, 肉類蔬菜都不比香港便宜, 澳門巿民必定和香港巿民一樣受食材價格上漲之苦. 不過梳打埠就年年有幾千蚊補貼囉!

 

折回富記附近, 其實在富記後面有一個很大的露天街巿, 住新橋區的巿民都愛在這裡買菜, 款式比紅街巿更多. 可從群隊街, 盧九街, 義字街或連勝馬路進入.

昌盛是一家老餅店, 非常受街坊歡迎. 不過連openrice都冇介紹過.  以前好鍾意買他的饅頭呀菜肉包呀回香港, 鬆軟好吃不黏牙, 正一又平又好食. 睇番旁邊的價錢牌, 都升左唔少喎, 包點價錢同香港差不多.


清蛋糕和疑似老婆餅


中/西/印式糕點都有

街巿內有幾檔燒味, 但以這檔最好生意. S小姐也忍不住幫趁, 不過我忘記了她買的是甚麼.

路過怡文軒台式麵包店, 醒起曾在某旅遊書中介紹過他的芋頭卷和微波麵包. 於是入內巡視下. 果然見到此兩款名物在向我們招手, 於是各買了一個和大家分食.

 

這是芋頭卷, 包身真是鬆軟得要命, 可惜芋頭餡調味太甜, 是一敗筆.  微波麵包則在記得影相之前巳被我們分屍, 比芋頭卷更好食. 下次來澳門一定要再來支持.

飲唔到咖啡明的藥煲咖啡太實在令我傷感, 搵間茶記慰藉一下空虛心寧先. 正在盤算去邊間好, 醒起K小姐兒子的好友是澳門人, 她推介新鴻發的豬扒包好食, 咁啱又喺我地酒店後面, 於是前往拜訪.

點了兩個豬扒包來share. 包身和豬扒雖然都烘得暖暖, 可惜水準一般. 塊豬扒調味ok, 但好薄, 似燈影豬扒.

至於奶茶, 一向澳門的奶茶都比不上香港的香濃, 或許是澳門愛淡口味, 港人愛重口味吧. 呢一杯都ok, 不至於淡!

新鴻發咖啡美食

地址: 提督馬路55號