2013年7月14日 星期日

又去碗屋

 


13-July-2013






又有得去碗屋食飯, 真開心,
最爽係唔駛我俾錢….哈哈哈

睇openrice先知, 原來碗屋在中環開了一家個名差不多的店, 叫"碗屋別館", 專門吃放題, 唔知兩者有何關係.

我地今次去碗屋老店, 就在中環新世界大廈地庫內, 都有十幾年歷史的了 



 





今次我地只有
4個人,
會點
只有午膳時間才供應的四人套餐.  以前在中環返工, 經常去碗屋食set lunch, 因為只要12:45pm前埋單, 就可享有半價.

落樓梯之前見到呢張紙, 似乎午巿半價呢d咁筍既嘢, 巳隨著歷史巨輪而淹沒.


餐廳面積其實唔細架, 旁邊仲設有一些卡位和廂房. 我地今日就被編排坐大廰.  平日一至五呢度迫到爆, 今日星期六就好鬆動




午餐時段除了set lunch之外, 還有四人套餐和放題. 不過中午食放題就有點誇


我地係立定志向點四人套餐的了.

頭盤有: 沙律, 雜錦刺身或雜錦壽司任擇其一, 我地揀左雜錦壽司. 手卷都可以揀海胆或toro. 我地一致揀海胆



主菜可揀三樣. 我地揀左蕃茄海鮮鍋, 銀鱈西京燒同埋鉄板薄燒牛肉


還有炒飯及湯烏冬可供選擇.  我地揀左炒飯


飲嘢要另外收費, 價目算好合理喎


有人要飲巨峰提子汁.  原來25蚊得咁細杯咋


最先上桌的是銀鱈西京燒. 唔揀佢就老襯, 去凍肉店買都要百幾蚊一磅. 呢度一客有四塊, 應該值兩舊水.  


呢個應該係menu入面所講的廚師推介小食. 佢係用一些薯絲包著蝦餅來炸. 幾香口好味既


碗屋沙律就係呢個麻醬蕃茄. 蕃茄好甜好好肉, 呢d澳洲大肉茄, 超巿賣好貴一個架


雜錦壽司就比較普通d啦, 冇一樣係貴價嘢, 刺身又薄. 明明上次食放題, 他們的刺身好鬼厚家嘛


薄燒牛肉依舊咁好味, 上次食放題時encore左3次添!  其實伴碟果片鹽燒茄子都唔輸蝕, 軟滑鮮甜又無燒到淋pat pat


海胆手卷. 左邊果個手卷有成4, 5片海胆. 但右邊果個就得2片, 分贓不勻噃老友


碗屋的炒飯一向上準之作, 炒得乾身唔油膩. 可惜呢餐前半段吸收左太多澱粉質, 攪到冇胃納食呢碗炒飯, 我只係食左幾啖咋


最遲來是這個蕃茄海鮮鍋. 上桌時, 我們的眼珠差點跌出來, 因為真係好大盤, 直徑相信有14cm. 上次食放題都有叫呢個清新又開胃的鍋, 但size細好多, 係呢個鍋既1/4到咋. 

呢個鍋真係唔叫就走寶扑心口. 鍋入面有4隻手掌咁長的大蝦,  另外的海鮮還有藍青口, 凡立貝, 三文魚鮫及腩, 還有N款新鮮蔬菜在內.  我地都係因為太飽, 只可以把它消滅到一半.



雖然飽到爆肚, 但碗屋的雪糕係唔何以miss既.  今日有四種味道選擇: 芒果, 綠茶, 芝麻同唔知乜嘢合桃. 我要了綠茶. 綠茶味很香濃, 雪糕又豐滿幼滑, 絕對唔係維X或牛X公司的貨式.



食緊雪糕時, 侍應走過來話今天特別一點, 會serve coffee or tea. 我要了一杯熱檸水消滯解膩.



如果唔想食放題飽到凸, 呢個四人套餐算是不錯選擇, 前題是最好四個人幫趁囉!










3 則留言:

1733 提到...

睇見你食我都流晒口水添,真失禮呀!
[版主回覆07/16/2013 12:22:21]我建議你先試放題, 多選擇過套餐嘛.

MOONmoon 如月 提到...

又幾抵喎,中環我祇識去食快餐,唔係好敢入呢啲餐廳,怕價錢貴呀
[版主回覆07/16/2013 21:15:46]剛發現一件人間慘事. 其實我舊年X'mas Eve都去過碗屋食過一次放題, 咁我仲寫左一篇誌, 本來想paste條link俾你睇, 點知發覺搵勻都搵唔到呀, 雅虎將佢吞左頂嘞. 放心, 碗屋入面既裝修唔係好高級架咋, 一般老牌日本料理咁囉. 佢既放題係貴, 大約500蚊一個人, 但食物質素係比其他坊間的放題店好好多架, 剩係坐得舒適同侍應有禮巳值回票價.

C Chan 提到...

好得BOR!!! 有機會去試吓先~
[版主回覆07/17/2013 21:02:28]碗屋真係唔錯. 雖然佢地既放題唔夠坊間的多款式, 但碗屋的食材精緻好多. 我最欣賞係佢地d侍應有禮貌好多. 我去過大X, 吉X,松X,宮X, 大X屋食日式放題, 呢幾間D侍應態度好鬼MK架.