2013年7月25日 星期四

“慢”遊老撾 ~ Day 14…..Part 2

 

 



12-Mar-2013 (Tue)






Luang
Prabang



(是日行程:Cooking
Class and Tamarind Cooking School
->
Sleeping Bus to Vientiane
)






逛完街巿就上返tuk tuk, 接著要開車前往上課的地點. 就在此時發生了一件小意外.



話說, 當我地街巿內週圍行既時候, 有一個小販檔係賣狗BB, 咁下圖中企最右面果位, 我用紅箭咀指住果位美國女士就問我: "d狗仔點解會喺街巿賣?" 咁我就答佢: "係賣俾人食既, 唔止老撾人, 其實越南人都好喜歡吃狗肉"






聽畢, 這位Michelle的女士就嚇到花容失色, 仲必埋眼淚添.  站在旁邊的導師見到呢位美國女士咁慈悲為懷, 就用左50,000K買左一隻狗BB用作放生之用.

Michelle就係咁抱住呢狗BB, 仲不停咁錫 (我心諗, 雖然我唔認同食狗肉, 但都冇埋由係咁用個咀錫一隻咁汚糟既狗架, d係個人衛生問題, 點知隻狗有冇狗瘟架).



我地一行人朝著街巿出口方向步行並上了tuk tuk, 就在呢個時候發現Michelle不見了, 導師返回街巿入面搵左十幾分鐘, 見佢好頹咁走返出來問見唔見Michelle, 好明顯Michelle唔喺架車度啦. 咁同Michelle一起報名上課的美國女子(她倆本身不是朋友, 是來到老撾, 在路上認識並結伴同遊的)提出話落車同導師一齊搵Michelle.



成車人足足等左Michelle半小時才見她抱著小狗施施然出現, 真是讓大家擔心死了, 明明頭先佢同我地一齊行出街巿家嘛!



tuk tuk車大約行駛左半小時, 就把我們送到了一個鳥語花香的地方

先穿過這條小徑


課室就蓋在一個芧屋內, 係咪好正呢? 好似去左Bali做spa咁呀. 雖然呢度冇冷氣, 但完全唔熱架, 通風又涼爽.





導師就會站在這工作枱先講解及示範. 食材巳經準備好晒了, 我們今天一共學五道菜式


食材經過我用肉眼驗屍之後, 確定係洗得好乾淨既.  來了老撾十幾日, 發覺乾淨呢兩個字真的久違了


課室對出是一個水池, 旁邊其實仲有一條小橋添, 不過我忘記了影相


導師首先示範老撾人如何把他們的主糧"糯米飯"煮熟. 做法同中國人真係好唔同架.

這兩個竹籮就是用來蒸糯米飯的. 糯米先清洗乾淨, 方法就好似我地平時煮飯咁, 加水後用手"初"2至3次. 跟住要用蓋過面的水浸過夜, 浸完就要將水濾去, 再加水,  又用手"初"2至3次才可以放入竹籮內蒸. 下面黑色果個鍋係放有一些滾水既, 佢地唔會放鍋蓋, 就咁開面蒸, 大約蒸半小時, 視乎米的多寡.


好, 正式進入戲肉. 導師示範的第一道菜是: Jeow Mak Keua (Eggplant Dip).  課堂上係沒有分派食譜架, 導師講解左一次, 就要記入腦, 返回自己個位度做.


先去蔬菜藍取茄子及其餘材料


跟住拎去隔離個"廚房"度烘到皮焦.


一人一個爐唔駛爭.  呢度就好熱嘞, 事關十幾個爐對住喎, 好似做緊sauna咁


燒到夠焦就可以去皮. 呢招我都識, Jamie Oliver成日都示範架啦~


去皮後就連同調味料一同椿爛晒再加些調味料就完成架啦


第二道菜是: Mok Pa (Fish Steamed in Banana Leaves). 真奇怪! 就只有這道菜有古早版Powerpoint.


睇下d魚幾新鮮, 一人拎一件返埋位



先整個汁醬. 把所需材料切好後係咁椿囉


魚肉切件後放入醬料內撈勻


跟住用蕉葉包好, 導師要每個學員都要為自己的制成品做記認, 否則個個一樣就搵唔到自己果件. 我就加香茅, 辣椒同檸檬葉


可以拎去炭爐度


第三道菜是: Oua Si Khai (Stuffed Lemongrass). 即是用免治肉釀入香茅內. 肉類可以係雞, 豬或牛, 我地今日係雞肉.


最艱難果部份是把香茅用刀仔戒成一個燈籠狀, 好多同學失販, 要搵過第二條重做. 呢個步驟既先決條件係要搵一條粗壯既香茅!

跟住又要椿爛d配料, 放舊免治雞肉落去撈勻


把雞肉釀入去個"茅燈籠"度, 嘩, 好鬼難呀! 你睇我整得幾樣衰


拎去炸


唔明導師點解要炸成十幾分鐘咁耐? 雞肉係好易熟的肉類, 仲要係咁細舊添, 頂多十分鐘乜都熟啦


第四道菜式是最多遊客認識的: Beef Laap (Minced Meat and Herb Salad). 在餐館可以見到用雞, 鴨, 牛, 豬或羊做的laap.  自從在Muang Ngoi Neua食過一個辣到變膶腸咀的chicken laap, 我唔敢落咁多辣粉


先把免治牛肉炒至7分熟, 用保鮮紙蓋好


跟住去揀配菜, 每樣配菜分別切碎


同炒好牛肉撈埋一堆再整次整水就攪掂


去到呢度稍為停一停. 導師請各同學去課室後面果張長餐枱度一起食返自己的作品.  企左幾粒鐘, 終於可以坐了. 樣樣好好食, 但鍾意食係舊蕉葉包魚, 真係滑到冇朋友


半小時後再回到一步之隔的課室, 跟住要學今天最後一道菜: Khao Gam (Purple Sticky Rice with Coconut Sauce)

由於時間關係, 黑糯米巳經煮好左.  雖然係咁, 導師都有示範點煮熟黑糯米既, 同煮白糯米有些不同


呢盤係新鮮椰絲


用新鮮椰絲煮個汁, 加入糯米飯煮至淋及入味


之後就趁熱伴生果食, 有梨, 火龍果同牛奶果


山竹


芒果同香蕉


仲有酸子同唔知乜嘢果


食完甜品就完成今天的課程. 真係咁多日旅程以來最開心的一天, 雖然都幾辛苦, 因為無諗過導師咁認真同誠意十足, 同埋課程係咁緊湊既.

之後坐上tuk tuk, 司機把各同學送回集合的餐廳, 果時導師才派發每一份的食譜呢.




我好似無介紹過我的同學? 其實是小班教學, 一班最多收生12人, 咁我呢班就有11人. 黑頭髮的就只有我和另外一個女孩, 不過佢係美國出生的老撾人. 她回來探親呀, 就是下圖中最右面, 穿白色上衣呢位小姐. 

其他同學大部份來自美國, 1位女同學是嫁左去澳洲的意大利人, 身穿吊帶低胸背心配短褲, 非常sexy, 不過佢好nice!

另外還有兩個來自加拿大的兩姐弟. 下圖中拿著相機的是弟弟, 在他身旁金頭髮的是姐姐. 我想講其實大部份同學都好友善, 係果條加拿大男口水多過浪花, 搭兩程tuk tuk車同埋lunch既時候都嘈嘈閉, 未曾有1秒鐘停過把口. 不停吹噓自己在老撾助養左幾多小孩, 又話自己好想喺老撾開辦幼稚園, blah blah blah..... 又話自己去旅行都最憎去首都, 來過老撾5, 6次都剩係去過Luang Prabang, 唔會去Vientiane, 因為果度太混亂又冇嘢睇. 我覺得呢個人係井底之蛙, 你都未去過又點可以作如此低能的評論呢?


返回巿區都係3點幾, 仲有幾個鐘至搭夜車去Vientiane. 我只可以好似孤兒仔咁週圍遊蕩, 天氣又熱到冇命, 真係慘.

Dao Coffee是老撾最大的咖啡品牌, 原來在Luang Prabang開設有cafe.


華人開的珠寶店, 你睇d中文字幾得意!




Luang Prabang的河景, d河水都幾濁架




後來我行到好攰, 去到一處有樹蔭的地方便停下來抖抖, 俾我遇到一個來自吉林的高小姐, 佢又係今晚搭夜車去Vientiane. 又係巳經check左out, 不過佢好好彩, 在路上認識了一位來自褔建的年輕女孩Mimi, 俾佢把行李存放在她處. 咁高小姐就邀請我一同回到Mimi的旅館休息. 真係好, Mimi的房間是有冷氣的啊!

原來高小姐也路上找到一個又是獨自一人上路, 同樣來自吉林的旅伴, 她叫宋小姐.  也在Mimi的房間的休息.

休息到差不多7:00pm, 我就步行回自己的旅館取回寄存的背包, 因為旅行社會派tuk tuk車來接我去巴士站. 呢架tuk tuk車又靚又乾淨, 最衰太黑, 唔係影張相留念.

Luang Prabang有幾個車站, Naluang Bus Station, 主要是南下的




今天的班次


明天的班次


就是坐這種VIP Bus去Vientiane. 原來我買的車票和高小姐不同, 佢果班車係7:30pm開, 而我果班車係8:00pm. 我地約定在Vientiane的巴士站等.


一早從網上得知由Luang Prabang往Vientiane的路況很bumpy, 所以我買既車票係睡下層的. 由於呢d sleeping bus係孖舖既, 上左車先至驚邊個會瞓我隔離, 千祈唔好係男人呀. 好在, 之後係一個小女孩和我孖舖. 我諗買票時, travel agent有特別交帶給巴士公司.

原來睡下層都係一樣咁"西", 無可能睡得熟. 我諗我成程車只係瞓左2粒鐘. 瞓我上面果條白痴, 明知條路bumpy就唔好上車前食嘢啦, 開車不到1小時, 條白痴跑落樓下嘔, 喺正我旁邊嘔呀, 嘔完仲要將個嘔吐袋就咁掉喺我附近, 正賤人

老撾的巴士不論長途或短途都好興超載的, 由於我張床好近上車處, 個司機同佢交替開車的司機成晚不停咁傾計兼開音樂, 又俾張凳仔一個男人坐喺走道中間, 呢條友老實不客氣, 成個人"'捱"落我隻腳度休息, 所以我根本冇可能瞓到覺.!!






1 則留言:

1733 提到...

點解你塊面咁立立靚嘅?
[1733回覆07/28/2013 15:36:41]
[版主回覆07/28/2013 13:49:17]我就是"法老王"個friend, "法癲王"