2013美食博覽

 

 

 

 

 

16-Aug-2013

 

 

家姐又有免費飛俾我, 所以就同父母去逛吓.

如果無免費飛都未必去, 而家d展覽會成$25張飛, 都幾貴下.


又是沿著灣仔行人天穚行過去會展, 一路行都唔覺得多人, 人流比起上月去書展少很多

入到會場, 都仍然好鬆動, 唔算迫人


一入去, 第一個見到的展攤是"日清", 真係好搶眼

之前睇報紙都介紹"日清"呢架手拉車仔係可以變身成為斜揹袋和側袋的. 不過當見到真身, d料好差下咋. 仲要一日分幾個時段至開賣, 懶巴閉.

再入紅A八吓. 入面有好多塑膠器皿賣, 連膠櫈都有


還有推介新產品, 不過剩係得display, 唔覺有得賣




日本魚肝油丸派出兩個唔同款既公仔人迎戰


兩個都係乖孩子, 企定定俾我影, 果然係kawaii ne!


呢間叫阿里吧吧的中東糖果店, d糖好鬼貴, 細細盒都百幾蚊






我最先有收鑊. 喺"養生糖"買左黑糖茶磚, 試過味道係唔錯既


$40包, $150可以挑四包.  佢地有好多款口味, 不過我就揀左呢兩款


隔離檔口賣鮑魚. 呢隻鮑魚用個錦盒鎖住, 堅大隻, 不過唔知堅定流


"魚類/蔬菜統營處"個攤位都唔嘢少. 賣好多嘢, 有機蔬果, 海味等等


最左面的是青檸. 不過大部份都唔標明價錢, 要人問至答


連入口急凍海鮮都有, 一於同其他入口商爭生意


這些叫做鳳眼果, 我知道炆來食好好味, 但媽咪話原來可以生食的


社企機構"土作坊"今年都有參展


他們賣的食材全是有機的

跟住俾我見到呢檔賣米糠油好抵下


$100兩枝, 仲送多枝細既. 上面果枝係糖尿病人都適合食用的agave syrup, $30咋.  出面好多都賣$6X


輪到媽咪發功, 佢見到"超力"的套裝好抵買, $230有9樣冷凍食物, 仲送一架車仔(其實我覺得架車仔的成本巳包含在套裝內)


架車仔入面的材質是冰袋來的, 所以都幾保冷架


拉開側邊係張櫈仔


$230包九樣冷凍食物. 兩包不同口味餃子(食左右手邊果包, d餡少得可憐, 同灣仔碼頭的水準差太多了), 一包獅子狗


一包煎餃子, 兩包魚餅, 一包蟹柳


一包讚岐烏冬, 一包稻庭烏冬


道地賣d一箱箱既茶都幾平, 但係好重呢. 我寧願將quota買一些特別d既東西


道地的香蕉奶都幾多人買, 我幾鍾意呢個袋仔. 不過無買. 曾在韓國飲過香蕉奶, 甜到無命, 所以唔敢買來試


老爸一向無耐性逛街. 逛行唔夠一小時, 佢就嚷著要走, 咁我地就俾左架車仔佢拎走, 我同媽咪繼續再血拼.

媽咪見到雪糕雙眼發光


好多款口味, 但傾向大路囉


不過$20可以揀兩球又幾抵食


我揀香芋椰子, 媽咪揀雲呢拿朱古力. 每一球都非常大, 食到我地好鬼飽. 至於味道就還可以啦, 香芋味好假


見到李錦聯喺度煮嘢, 原來佢係泰國食品牌子"梭坤敬"的代言人. 真人都算幾靚仔架, 你睇阿婆幾嗒佢糖


呢檔賣台式甜品的. 佢地d蛋糕甜品都唔平架.

雪梅娘, 香港唔興好耐


有點似宜蘭的奶凍蛋糕捲


呢幾粒白色的糖, 好似叫俄羅斯軟糖, 試食架$20/四粒. 我剩係想食一粒咋, 如果唔好食, 咪嘥左果3粒, 所以最後無買到


韓國館永遠都咁多人


本來無諗住迫埋去, 但係聽見職員喺度sell, 佢地果隻公仔麵係得奬的. 咁我又醒起最近睇過報紙, 有個勁鍾意食公仔麵既鬼佬, 佢攪左個website, 將全世界的公仔評分, 呢隻"農心"出的公仔麵被評為全世界第三名. 香港都有一隻公仔麵都好似入圍, 得第九名


$75/兩包, 每包有4個公仔麵, 咁咪即係差唔多$9.5個! 我就無乜興趣, 不過母親大人勁like! oss 佢堅持要入貨


韓國網紋蜜瓜$45個, 唔算貴. 不過真係無本事拎住個瓜週圍行


"益力多"個攤位都好大, 買一排$10. 本來我對佢地隻毛公仔好有興趣, 不過要加錢買我就唔考慮. 細隻公仔$12蚊, 大隻賣$40


下圖是大隻的公仔, 職員話成本都要$45隻喎!


老字號"張榮記"呢幾年都好努力參與展覽推廣他們的蝦子麵. 我都好欣賞佢地既蝦子麵
 

"海天堂"有個好大同佔前排位置, 不過就無乜人問津


香港人真係好喜歡食榴槤及其副食品. "醉榴香"的攤位超多人, 不過佢地既月餅好貴, 小妹家貧食唔起呀.


另外, "醉榴香"都有代理一些印尼海產. 不過價錢好高級, 我去街巿買活的海鮮都唔駛咁貴


呢檔代理西班牙火腿好平, 上次在冬季購物節都見過佢地擺檔. 呢包火腿$100/兩包. 在Apita賣緊$8X包架.



見到有60度魚露賣, $80兩枝. 記憶中朋友話在荃灣買, 一枝都係$4X, 所以呢度都未必係最平宜既. 不過買開嘢就順便買埋, 事關60度魚露唔係度度有.





"聯記號"除了賣菇菌類之外, 仲有賣宣威火腿. 火朣一件$228, 買兩件就$400.  另外火腿骨就$55盒, 職員見我地買左一包火朣, 就自動減收我地$5, 即係盒火腿骨只需$50. 佢地用火朣同火腿骨煲左一鍋粥請客人食, 咁我地試過味真係唔錯, 所以先入貨.

題外話: 有條拖車仔的八婆, 見我同媽咪喺度揀火朣, 佢一嘢攝左入我同媽咪中間喺度摸d火朣. 咁職員以為佢都係想買火朣, 於是好心提議俾果條八婆, 你地一人買一件火朣, 我收你地$400啦. 條八婆好似聾左咁, 睬都唔睬個職員, 自顧自攞人地d粥食. 好心咪咁乞兒啦, 你咁辛苦"掙"入黎攝位, 就係為左果一啖大約只有10ml的粥. 真是醜熊百出.



其他的戰利品

"明樂屋"代理很多日本食品. 醬料$50/三枝任揀, 左同右邊是麻油, 中間的是淡口醬油. 特別要介紹右邊果枝麻油, 超巿賣$3X.


屋企明明仲有幾罐午餐肉, 但媽咪見到平, 又買!

長城牌白豬, $50/三罐.


韓國黃糖$15包, 我見過最平都要$23.


又係媽咪買的. 左邊的是即食的煙豬手, 中間的是煲湯用的咸豬手, 右邊的是咸牛脷. 三樣嘢共銀$110