(是日行程: Pakse-> Si Phan Don的Don Khone島)
旅行社會於8:00am派車來旅館接我去車站搭巴士前往Si Phan Don. 咁今日都仍然係要早起(來了老撾咁多日, 我都慣了早睡早起
就去旁邊Lankham Hotel附設的麵檔吃牛肉湯粉吧. 不論Lonely Planet或張佳樺本書都讚佢好味, 咁我又有乜理由說服自己唔去呢?
Lankham Hotel的麵檔只於早上及中午營業, 午後打烊
麵檔分室內及室外, 室內有冷氣, 我梗係無咁蠢, 踎出面食塵啦. 室內環境幾乾淨架, 老撾少見
menu一眼睇晒, 只有湯粉可以食, 飲品價錢OK, 但湯粉既價位就比較高了, 成HK$20碗湯粉, 在香港好出名的"香港仔南記粉麵", 食一碗魚蛋粉都係十幾蚊. 可能呢度係做遊客生意的關係再加上Lonely Planet的加持吧! 而事實上都唔多覺本地人幫趁.
我點了細碗的牛肉湯粉(20,000K). 來了咁多日, 終於唔駛食肉碎, 可以食到一塊塊既牛肉, 可惜當地人永遠要煮至d牛肉鞋烚烚. 張佳樺話呢度既湯粉"超超超讚", 我諗佢梗係未去過越南. Lonely Planet既評語就話"呢度服務態度差, 但為左啖咁美味既湯都要忍". 而家開估, 呢度既湯底係酸既, 同我喺越南食既湯粉差天共地.
雖然Pakse好多越南人, 巿內有N咁多間越南餐同 越式三文治小販檔都係佢地開既. 但因為佢地巳經移民來老撾久了, 連口味上也改變, 或許是遷就老撾人吧. 總之我就唔覺得好味啦.
枱上面有一些插到好似筷子咁既生白豆角任食. 另外每位客人都會奉上一碟椰菜及左邊這種食越南河粉一定有既香葉, 一時唔記得叫乜名添.
仲叫左一杯少甜既熱咖啡(5,000K)
Si Phan Don又稱為Four Thousand Islands, 大陸同胞叫佢做四千美島. Si Phan Don位於老撾的最南端, 對岸便是柬埔寨, 很多遊客遊畢Si Phan Don都會進入鄰國柬埔寨繼續玩的, 當然, 亦有很多人選擇從柬埔寨進入Si Phan Don. 據周榕榕的書中資料所說, 每逢旱季時, 老撾南部的湄公河水位下降, 河面上便會泛出無數大大小小的沙洲及島嶼, 當中最大的三個島(Don Khong, Don Det及Don Khone), 近年成為遊客的天堂.
食飽就回旅館執行李及check-out. 去完Si Phan Don之後我會返回Pakse, 入住同一間旅館. 所以攞定張咭片, 回程如果有需要搭tuk tuk車, 都可以出示俾司機睇, 唔駛雞同鴨講.
未夠8:00am便坐定定在旅館門外等車接.
好在昨天醒目, 問個agent攞聯絡電話. 等到8:20am都未見車來接, 於是我便打俾我個agent - Souliya, 催佢, 因為明明昨天佢話佢會開車來接我. 結果係, 老撾人 = 老點人! 來接我的是第二位司機. 接左我, 再兜多幾個圈去其他旅館接其他旅客. 卒之攪到差不多8:30am, 架車居然去返昨天買車票果間LNC Tourism便停下來. 原來有一架泊在旅行社門外, 紅色的巴士巳經在上客. 好處是各人不用去8km以外的南巴士站上車囉.
呢架車既乘客, 大部份都是去Si Phan Don既, 不過都有幾個鬼妹仔係去Cambodia. 去Cambodia就會晌中途某處讓你下車, 再轉唔知乜嘢車.
巴士開了約1小時, 大約10:00am後便在一處長途車休息站停車, 一停就停左半小時. 我見到司機同幫手拓行李果個男仔就去左食飯. 唔明點解老撾人咁早就要食飯. 
再開車, 大約11:30am便到Ban Nakasang. 所有乘客都要在這條小村落下車, 然後自行行去碼頭搭船去你想去既島. 落車時, 我不停煩住司機喺邊度上船, 因為果度d人, 你唔問佢, 佢係唔會主動講架. 所以我咪話, 南部的旅遊業從業員唔夠北面的pro囉
司機指住一個方向, 咁我咪拎返我個背包咪行囉. 同車的全是老外, 唔明佢地點解好似食左幾擔豬油咁, 完全唔駛問司機, 跟住去邊度搭船, 真係超級是煮到來就食的心態.
Ban Nakasang其實就只內上圖呢一條小街, 向海方向行就會見到下圖的"碼頭".
找到boat ticket office, 我向職員出示我張由Pakse往Si Phan Don的車票.
咁佢就跟住問我去邊個島, 然後俾另一張票我拎住, 叫我喺度等搭船. 等了不久便可以登船. 來Si Phan Don的遊客主要遊覽三個島 分別是: 最大的Don Khong, 最多遊客但面積最細的Don Det及第二大島Don Khone.
我唔想去咁touristy既地方, 好似之前去Vang Vieng咁, 週圍都係酒吧, 嘈到震的地方我唔鍾意, 所以揀左去Don Khone閉關.
補回少少資料. 原來去Don Khong的遊客並不會在Ban Nakasang下車轉船. 我地頭先架紅色巴士車有一個老外去Don Khong, 咁我見佢早我地差不多半個鐘頭下車, 我見司機叫佢落車同埋指俾佢睇碼頭喺邊度.
這圖從網上下載. 可見Don Khong島是最大, 而且和Don Det及Don Khone是有一段距離的. 由於Don Khong島和Don Khone島的發音幾乎一樣, 所以遊客一般都稱Don Khong做big island, Don Khone做small island.
船大約開了30分鐘便先停泊在Don Det, 大部份的人都下船(果然都是中了Lonely Planet的毒)! 隻船連埋我, 剩返5個遊客係去Don Khone的.
我地個衰船夫, 搵左一個都唔係碼頭既山坡就泊船, 要我地好辛苦咁爬山上去, 我人又細粒, 背包又重. 好在同船的鬼仔鬼妹幫我一把才可以上到岸.
事情沒有在Muang Ngoi般順利. 我一心去找張佳樺推介的住宿Phonvilay Guesthouse, 依照她的direction, 下了船後, 向右轉, 直至找到一間廟就會見到. 原來呢間民宿係行到最入最入的, 幾乎斷氣兼腳跛. 好不容易找到, 民宿主人居然話今天無房, 真是激氣
我落腳的民宿叫Khao Paeng Guesthouse. 我見民宿負責的英文幾好, 我check房後, 見到盞燈唔著叫佢修理佢都答應. 所以我都唔諗咁多了.
Khao Paeng Guesthouse只有2間向河的bungalow, 負責人話兩間都住左人, 仲要住左好多人, 趕都唔且果種! 我只可以住在看"樓景"的bungalow.
我住5號bungalow
我的basic request是一定要有吊床!
張吊床唔夠Muang Ngoi住的Saylom Guesthouse舒服
房間都唔係太差既....只要你睇過呢個島其他民宿的質素的話
我搵左咁耐至搵到落腳地方既原因係, 喺Don Khone既民宿, 好多都沒有private bathroom同hot shower, 所以我呢間民宿有提供, 我就lur飯應啦
而且成1:00pm了, 又攰又口渴. 去搵間餐廳食個午餐, 飲杯凍嘢先咋. 這間Tavendang Restaurant比較乾淨, 我都幫趁左幾次
遊客來到島仔玩, 最希望既梗係食飯一定要對住個海啦. 老撾成個國家都無海, 只可以向河, 咁自然嘢嘢都要望住條河至過癮既, 唔係山長水遠來做咩呀
素菜炒飯(15,000K)同埋7 Up (6,000K). 碟炒飯味道唔錯架, 仲唔油膩添
我都話要對住條湄公河至食得落架啦
店主養的貓咪過來討吃
呢餐飯食足兩個鐘, 係咁對住條河發吽哣都幾爽. 之後回民宿梳洗過後便躺在吊床上hea到5:00om再出外走走. Don Khone呢d島仔, 溫度比Pakse更高, 中午時份真的不宜外出.
5:00pm便看到夕陽了, 美不美?
來到小島過日子, 純粹諗住好似其他外國人咁hea住過, 都無乜特別編排行程, 小島上的觀光點, 打算一天看一個, 完全是嘆慢版.
拿著相機無目的地走, 邊走邊拍. 島上都有好幾間旅行社, 順道看看之後反回Pakse的車/船票是多少.
回程居然平d, 只需50,000K
小島上的居民都是在河裡洗澡的, 他們一般在黃昏便出動, 小孩子趁機玩水
想起一首好襯的歌曲. 馬來亞春色, 綠野景致艷雅, 椰樹影......
Don Det島同Don Khone島其實是很接近, 兩島中間有一條橋, 叫做"(French Bridge)法國橋"的雙連著. 柬埔寨就只是隔著條湄公河, 絕對係游水都可以游過去.
這條便是法國橋, 當然是當年法國人興建的啦
橋下有一個指示牌, 告訴遊人島上的觀光點和這裡的距離
指示牌正對面, 是有個收費亭. 遊客都要過橋去Don Det島又或者要向前行(往南行)都要留下買路錢. 其實過左呢個藍色收費亭之後還有好幾家食肆及民宿, 唔明點解咁搶錢, 過左呢個位要收錢! 其實今早我去找Phonvilay Guesthouse時也經過這裡, 被入面的職員截停, 咁我話我要搵民宿, 佢地才放行我.
外國人的買路錢是25,000K, 真是無道理! 張佳樺本書去年10月才出版, 書中都有一張相同的照片, 明明是20,000K, 不夠半年巳漲價至25,000K.
道高一尺, 魔高一丈, 收費亭職員都會放工, 他們是5:00pm下班的. 如果你想溜過去Don Det島又唔想憤氣畀錢的話, 就5:00pm後過去啦, 我見好多老外都係咁.
收費亭旁邊有一條樓梯便是上法國橋
我自命算死草, 當然係趁機過橋啦, 這張相是回望Don Khone島拍的
這張便是Don Det島的民宿. 我過去Don Det島的另一個原因係想睇下有無更好的民宿可以選擇. 可惜行到天都黑晒都找不到. Don Det島面對著Don Khone島的一面叫個Sunrise Boulevard, 一來係比較少民宿, 二來我見間間bungalow都係occupied架. 幸好我揀左Don Khone落腳, 如果在較受老外歡迎的Don Det, 可能行幾個鐘都搵唔到住宿既地方.
沒有留言:
張貼留言