2013年9月4日 星期三

“慢”遊老撾 ~ Day 23


 
 21-Mar-2013 (Thu)

 



(是日行程: Don Khone 返回Pakse)



 



時間如流水, 一眨眼又四天過去. 身為都巿長大的超齡電波少女, 對小島的生活是感覺有點悶的, 但唔知點解, 而家要離開了, 又突然有依依不捨感覺. 喺呢度生活真係好悠閒, 我反思著, 我人生的下半場還可以過如此悠悶的日子嗎?

今朝搭11:00am的船往Ban Nakasang村, 再由這裡搭車返回Pakse.

每天也經過這棵在民宿的老大樹無數次, 但今朝見佢生左一頂大白菇出來


最後一餐在Don Khone, 不想再冒險試新餐廳, 還是去返Tavendang Restaurant, 他們家的食物較有水準



我點了baguette with omelette(10,000K)及凍咖啡(10,000K). 凍咖啡水準依舊, 老闆娘好有心機沖咖啡. 而於點解之前明明話baguette難食都仲要食, 係因為呢個omelette餐跟既. 老撾人煮omelette, 煮到好老又鞋. 唔同我地食慣果d


如果你覺得我呢幾日很無聊的話, 你是對的. 我一直以為Don Khone咪最多好似長洲咁大, 其實唔係, 係好鬼大, 用走的, 真是行到腳到破.  所以這裡也有單車出租, 租金不算特別貴, 10,000K一天. 問題是我呢個五短身材, 又二十年無踩過單車的人, 根本無膽量駕馭呢d咁高既單車, 我連騎上去都成問題.






我之前講過呢個國家的路大部份是泥路, 爛路, 無忽好肉的. 但原來好戲在後頭, Don Khone這些島仔, d路況更加不堪. 這張相睇起來唔覺, 實際上路面充滿陷阱. 路上突出好多好大粒的石頭, 有時又有大水氹, 對唔識踩單車既人, 例如我, 是一大挑戰. 我認我無guts, 然而一個人在途上, 上策是首先注意自身的安全, 島上並無medical service, 連藥局都無. 所以無謂搵命博.


臨走先見到呢類, 應該係載遊客週圍去的電單車, 如果早d見到, 我都會租一日去較遠的旅遊點



抵達Don Khone果一日, 我地隻船臨泊岸, 見到幾個老外在玩tubing. 不過湄公河d水質真係好汚糟, 我自己帶左泳衣都無用武之地. 當地人就喺條河度沖涼, 洗衫, 排汚又係排落條河度, 絕對要好大勇氣至敢落水


島仔的物資都不算太貧乏, 為迎合老外口味, 我連乳酪都有見過喺呢類士門前的雪櫃入面出現.


距離11:00am仲有成粒鐘. 都係飛撲返去自己張吊床度搖多陣先, 都唔知幾時再有機會咁爽.


補充: 其實Don Khone島還有一個很著名的觀光項目, 便是在島的最南端觀看海豚嘞! 這裡的海豚品種是是稀有的伊洛瓦底江豚, 是有國際動物組織專責保險它們的.  根據張佳樺的書, 包一艘船出海看江豚100,000K, 可坐三人. 攤分每人才33,000K.  由於有動物組織規劃觀看的距離, 好多睇過的網友都話無乜特別兼無聊, 有些網友更話睇唔到添!

觀看江豚的地方, 離我屋住的民宿可以話一頭一尾, 我又不會騎單車, 在衡量下, 便放棄了看江豚了
.


揈到差不多10:45am便check-out, 是時候和悠閒的Don Khone島說再見.

把鎖匙交回民宿負責人, 這位年輕人很有耐性及時時都笑容滿面, 他還幫我提背包及領我去碼頭搭船.

回程坐的船不算太多人, 唔駛坐得咁迫夾.  遊客的背包一般放在船頭或船尾


航程約半小時便返回交通中轉地Ban Nakasang


慶幸我是囉嗦長氣麻煩怕死怕蝕底的人, 上船前問了民宿負責人, 我下船後應該去那裡搭車返回Pakse. 咁民宿負責人就教我跟住船伕, 船泊好後, 船伕是會帶客人去等車的地方. (又再講一次, 在老撾南部玩, 很多人都不會英語, 所以有機會遇到懂英語或能夠溝通到的當地人, 不防問多d, 問清楚d, 咁係最冇死既)

跟我同船有幾個老外, 又唔問船伕就自顧自上了岸行左唔知去邊, 船伕叫都叫唔住佢地. 好在我醒目, 死跟住船伕. 其實所有前往Pakse又好, 其他目的地又好, 都會在這家叫Sengchalernco Ltd的旅行社門外等車.


這家旅行社主要提供交通服務. 有個拎住張紙的男人, 相信是旅行社職員的人, 叫大家喺度等車, 大部份人其實都係去Pakse, 但都有幾個係去第二個目的地既.


車未到就行下呢條只有一條短街, 但又身為重要交通中轉站的Ban Nakasang. 成條街仔都係賣無聊嘢 


食物都有. 這些串燒, 我就唔敢食


還有一些炸物及越式米紙卷.  我都係prefer返回Pakse先食嘢........


來的時候又係坐呢架紅色車, 回程又係坐返呢架車.....我諗旅行社得一架車運作. 司機同助理都係果兩個人. 助理係咩意思? 在老撾, 每一班車, 除了司機外, 都會有一個助理負責幫客人抬行李上車頂. 有時還會多另一個助理(通常係女性)幫手收車票.  果個抬行李的助李是會讓人一見難忘的, 因為他只有一顆眼睛, 另一隻, 好明顥係假眼.


行車大約3小時便回到Pakse. 旅遊巴在LNC Tourism Co門外停下, 即是我買車/船票去Done Khone的旅行社. 真方便, 這旅行社距離我入住的Alissa Guesthouse其實只是一, 兩分鐘的腳程.


臨去Don Khone前, 我巳吩咐旅館職員留一間單人房給我, 所以我不需再為住宿張羅.  放好行李, 沖過涼便到樓下reception買明天前往Wat Phu的來回車票(105,000K). 好貴, 但無法子, 因為我之前問過附近的旅行社, 係無local tour去Wat Phu, 就算有, 都貴到嘔.  這兒的旅行社比北部的更會吸血.


買了票又出發去找吃的. 幫趁這間由越南籍老闆娘開的店幾次, 她經常笑面迎人, 又會幾句簡單單英文, 所以都係幫趁返佢.


店面很通爽清潔


老闆娘叫我落呢d醬, 同d麵一齊食. 我落左少少, 原來辣到無命陪的, 不過辣得幾過癮, 同湯麵是絕配


我點了Noodle with pork 及一罐百事可樂 (20,000K). 越式口味, 不錯, 最愛是脆卜卜的豬皮, 久違了


之後行入街巿巡下, 街巿有兩檔生果, 幾日無食過生果, 好想食. 買了2個芒果, 收我(14,000K). 原來呢d芒果係來自泰國的水仙芒, 不是老撾國產的.

跟住見到一個好可愛的小妹妹在賣燒烤. 自從在Luang Prabang食過美味燒魚便認定燒魚是好味的. 於是幫趁小妹妹好買了一條燒魚(18,000K). 返回酒店慢慢嘆, 點知呢條魚d肉仲霉過霉香咸魚, 我吐都吐唔切, 成條掉左佢




沒有留言: